800-н тахса кыталык ааспытын бэлиэтээтилэр

Саха сиригэр биир саамай сэдэх, кэрэ туруйа көрүҥнээх үрүҥ кыталыгы үөрэтэр уонна харыстыыр сыалтан, учуонайдар, экологтар уонна олохтоохтор күүстэрин холбоон, «Полет стерхов» диэн улахан бырайыагы саҕалаабыттара.

Быйыл айылҕа харыстабылын уонна наука эйгэтин үлэһиттэрэ «Полет стерхов» бырайыак чэрчитинэн кыталык сааскы көһүүтүн, ханан тохтоон ааһарын кэтээн көрдүлэр диэн СӨ Биологическай ресурсаларга, ураты харыстанар сирдэр уонна айылҕа пааркаларын дириэксийэтэ иһитиннэрэр.

Бырайыак сааскы түһүмэҕэ Саха сирин 13 улууһун хабан, кэтээн көрөөччүлэр 800-тэн тахса кыталык уйаланар, төрүүр-ууһуур сиригэр көһөн иһэрин бэлиэтээтилэр.

Бырайыак биир сүрүн түһүмэҕинэн Алдан өрүскэ баар Куолума-Чаппанда ресурснай заповеднигын территориятыгар экологическай ыллык оҥоһуллуута буолуоҕа, исписэлиистэр билигин хайысхатын кэтээн көрөллөр.

Өссө быйыл манна саҥа хахха сири оҥоруохтара: тутааччылар наадалаах матырыйаалы барытын тиэйэн, үлэни саҕалаабыттар.
Ону сэргэ утары биэрэккэ, Томпо улууһун Охотскай Перевоз нэһилиэгэр Визит-киин тутуута саҕаламмыт.