9-с кылаас үөрэнээччилэриттэн сүрүн судаарыстыбаннай эксээмэни туттарар туһунан сайабылыанньаны ылыы түмүктэннэ

Кулун тутар 1 күнүгэр 9-с кылаас үөрэнээччилэриттэн сүрүн судаарыстыбаннай эксээмэҥҥэ сайабылыанньаны ылыы түмүктэннэ. Урукку сылларга курдук быйыл 9-с кылаас кэнниттэн эксээмэни барыта 14850 оҕо туттарыаҕа.

Сүрүн уопсай үөрэхтээһин аттестатын ылар туһугар бүтэрээччилэр түөрт биридимиэккэ эксээмэн туттараллара ирдэнэр: икки булгуччулаах (нуучча тыла, математика) уонна икки биридимиэти талан. Ааспыт сылларга курдук үөрэнээччилэр ордук география уонна информатика биридимиэттэрин хото талбыттар.

Санатан эттэххэ, 9-с кылаастарга эксээмэн  үс түһүмэҕинэн ыытыллар: сүрүн болдьох иннинээҕи (муус устар 22 күнүттэн ыам ыйын 17 күнүгэр диэри), сүрүн түһүмэх (ыам ыйын 21 күнүттэн от ыйын 2 күнүгэр диэри) уонна эбии түһүмэх (балаҕан ыйын 2-23 күннэригэр). Бу туһунан Үөрэх уонна билим министиэристибэтин телеграмыгар суруйаллар.