9 ыйдаах хат диэбиттэрэ — атын эбит…

Быраастар 30 саастаах дьахтар иһиттэн олус улахан кистаны эпэрээссийэлээн ылбыттар. Дьахтар иһэ 9 ыйдаах хат буолбутун курдук улааппыт эбит. Диагноһын Дьокуускайдааҕы өрөспүүбүлүкэтээҕи килинииичэскэй балыыһа мобильнай миэдиктэрэ Муома улууһугар үлэлии сылдьан, булан, туруорбуттар диэн ЯСИА суруйар.

Киста бу маннык улаатара сэдэх буолар, искэ хайдан, хаана барыан, киһи өлүөн да сөп. Дьахтар сыл аҥаарын быһа иһим ыалдьар, улаатар диэн үҥсэргиир эбит.

— Пациентка хат буолбатах эрээри, 9 ыйдаах курдук улахан, кыбыс-кытаанах истээх этэ. Биһиги миэдиктэрбит балыыһаны кытта сибээстэһэн баран, кинини тута Дьокуускайга суһаллык аҕалбыттара. Эпэрээссийэ кэнниттэн, билигин дьахтар туруга үчүгэй, дьиэтигэр номнуо төннүбүтэ, — диэн килиниичэскэй балыыһа биригээдэлэрин сэбиэдиссэйэ Изабелла Тихонова кэпсээтэ.

Киста дьахтар төрүүр уорганыгар (яичнигар) тахсыбыт эбит. Дьиҥэ, бу уорган кээмэйэ олус кыра, хайдах хайдыбакка сылдьыбыта, дьэ, боппуруос.

Эпэрээссийэни Дьокуускайдааҕы өрөспүүбүлүкэтээҕи килинииичэскэй балыыһа гинекологическай отделениетыгар оҥордулар. Киста иһиттэн 3,5 лиитэрэ ууну тохтулар.

Миэдиктэр ыарыыны тулуйа сылдьыбакка, эрдэттэн көрдөрөн, эмтэнэргэ сүбэлииллэр.