92 тыһыынча киһи төрүүр-ууһуур доруобуйатын бэрэбиэркэлэннэ

2025 сыл саҕаланыаҕыттан  92 тыһыынчаттан тахса киһи  төрүүр-ууһуур доруобуйатын туругун бэрэбиэркэлиир диспансеризацияны ааста диэн Доруобуйа харыстабылын министиэристибэтэ иһитиннэрэр. 

Арассыыйаҕа оҕолонор саастаах нэһилиэнньэ (18–49 саастаах) доруобуйатын бэрэбиэркэлээһин 2024 сылтан саҕаламмыта. Бу сэрэтэр миэрэ гражданнарга төрүүр-ууһуур доруобуйа ыарыыларын эрдэ булан, үрдүк технологиялаах мэдиссиинэ көмөтүнэн, кэмигэр эмтэнэргэ кыах биэрэр.

Бу сыл тоҕус ыйыгар 47 217 дьахтар уонна 39 839 эр киһи көрдөрүннүлэр. Иккис түһүмэҕи 3871 дьахтар уонна 1672 эр киһи аастылар.

Миэдиктэри ордук дьахталлар уонна эр дьон ортолоругар кыайан оҕоломмот буолуу элбэхтик көстөр буолбута долгутар. Аныгы үйэҕэ төрөөһүн ахсаана аҕыйыырыгар ыал буолуу уонна ийэ буолуу хойутаан былааннанара, 1 эрэ оҕолоох ыаллар элбээһиннэрэ эмиэ дьайар. Бу барыта, уопсайынан ыллахха, дойду демографиятыгар дьайар.

«Бу усулуобуйаҕа сөптөөх демографическай бэлиитикэни ыытыы судаарыстыба сүрүн соруга буолан эрэр. Төрөөһүн ахсаанын үрдэтии, төрүүр-ууһуур саастаах дьон доруобуйатын харыстааһын уонна тупсарыы, оҕоломмот буолууну кыайыы билигин стратегическай соруктар буолаллар. Онон бу диспансеризация маны ситиһэргэ көмөлөһүөн сөп. Ол иһин биһиги 18-49 саастаах дьону диспансеризацияны ааһалларыгар  сүбэлиибит», — диэн доруобуйа харыстабылын министиэристибэтин кылаабынай акушер-гинеколога Лилия Анкушева эттэ.

Репродуктивнай доруобуйа туһугар кыһамньы хас биирдии дьиэ кэргэн уонна уопсастыба бүтүннүүтүн инникитин туһугар инвестиция буолар диэн доруобуйа харыстабылын миниистирэ Лена Афанасьева бэлиэтиир.

Саха сиригэр төрүүр-ууһуур доруобуйаны көрөр-истэр диспансеризация «Дьиэ кэргэн» национальнай бырайыак чэрчитинэн ыытыллар.