ВИДЕО: 930 үөрэнээччилээх оскуола биир симиэнэнэн үлэлиэҕэ

Билии күнүн көрсө бүгүн суруналыыстарга балаҕан ыйын 1 күнүгэр үөрүүлээх быһыыга-майгыга аһыллыахтаах, СӨ бастакы бэрэсидьиэнэ М.Е.Николаев аатынан Дьокуускай куорат 40-с нүөмэрдээх оскуолатыгар пресс-туур тэрийдилэр.

Урутаан эттэххэ, тустаах оскуола өрөспүүбүлүкэ улахан оскуолаларыттан биирдэстэрэ буолар. Иккиһинэн, 930 үөрэнээччилээх биир симиэнэнэн үлэлиир соҕотох оскуола диэтэхпинэ, бука, сыыспатым буолуо. Манна киһи сөҕө-махтайа, сонургуу көрөрө элбэх.

Тустаах оскуола дойду бэрэсидьиэнэ Владимир Путин көҕүлээбит национальнай бырайыак иитинэн тутуллубут. Национальнай бырайыактар үлэҕэ киириэхтэриттэн Саха сиригэр барыта 60-тан тахса эбийиэк үлэҕэ киирбит. Күн бүгүн бу үлэ салҕанар, 2030 сылга диэри барыаҕа диэн миниистири солбуйааччы этэр.

Үөрэх уонна билим миниистирин солбуйааччы Степан Степанов: “Оскуола 990 миэстэлээх. Саха сирин улахан оскуолаларыттан биирдэстэрэ. Саҥа эбийиэктэр үлэҕэ киириилэринэн сибээстээн, элбэх үөрэнээччилээх оскуолалар ноҕуруускалара кыччыахтаах” – диэн бэлиэтиир.

Оскуола уопсай иэнэ 17 тыһ. кв.м. тэҥнэһэр, үс мэндиэмэннээх, үс блоктан турар.

Оскуола дириэктэрэ Галина Васильева: “Оскуолабыт балаҕан ыйын 1 күнүттэн үлэтин саҕалыыр. Күн бүгүн 930 оҕо бирикээһинэн үөрэххэ киирдэ. Математика, мэдиссиинэ, педагогика, инженернэй, естественнэй-билим кылаастар аһыллыахтара. Биир симиэнэнэн үөрэниэхпит, эбиэт кэнниттэн араас эбии дьарыктар аһыллан үлэлиэхтэрэ. Бастакы, бэһис кылаастарга төрөппүттэр, үөрэнээччилэр сайабылыанньаларынан, баҕаларынан иккилии сахалыы кылаастар, атыттарга биирдии саха кылаастара аһыллыахтара. Ону таһынан, 2-10 кылаас оҕолоро ханнык кылааска үөрэнэллэриттэн тутулуга суох оҕолор саха тылын судаарыстыбаннай тыл быһыытынан үөрэтиэхтэрэ.

Учууталлар аҥаардара эдэрдэр, аҥаардара уопуттаахтар. Барыта 90 киһи үлэҕэ киирдэ” – диэн кэпсиир.

Биир блокка киирбиппит алын сүһүөх кылаас оҕолоро үөрэнэллэр эбит. Паарталар биирдии оҕоҕо тус-туспа суоттаммыттар. Эчи уратыларын, аныгыларын, сырдыктарын. Аны хас биирдии хос ааныгар суруга барыта сахалыы-нууччалыы икки тылынан суруллубут. Өссө биир уратыта диэн, кэбиниэттэр жалюзилара тиэмэтинэн биллэрэр-көрдөрөр ис хоһоонноохтор. Икки спортивнай саалалааҕыттан улахана букатын ат сүүрэр сирэ (540 кв.м.), эбиитин үөһэ өттүгэр тренжердаах. Остолобуойдара эрэстэрээнтэн уратыта суох киэҥ-куоҥ. Онтон аактабай саалатын киһи этэ да барбат.  Быһатын эттэххэ, биһиги көрүүбүтүгэр барыта сонун, ураты…

Бу күн оҕотун оскуолаҕа киллэрээри сайабылыанньа биэрэ кэлбит Дьокуускай куорат олохтооҕо Сааскылаана Петрова: “Бу М.Е.Николаев аатынан оскуола чахчы үчүгэй оскуола буолуохтааҕын эрдэттэн билэр этибит. Улахан оҕобутун 8-с кылааска манна үөрэтээри сайабылыанньа суруйа кэллибит. Кырабыт быйыл 4-с кылаас, онон алын сүһүөҕү 3-с оскуолаҕа түмүктээбитин кэннэ эһиил, 5-с кылааска эмиэ манна көһөрөр былааннаахпыт” – диэн этэр. Кыыһа Сияна саҥа оскуоланы сөбүлүү көрбүтүн, аныгы көстүүлээҕин туһунан санаатын үллэстэр.

Оскуола Билии күнүгэр бэлэмнэнэн үлэһиттэр күннэтэ субуотунньуктары ыытан, үөрэх саҥа кыһатыгар олох оргуйан олорор.