94 саастаах ытык кырдьаҕаска куһаҕаннык сыһыаннаспыт киһи кимэ буолара билиннэ

Бүгүн социальнай ситимнэринэн биир эр киһи ыарыһах кырдьаҕас дьахтары  охсуолаан, тэбиэлээн кирилиэстэн түһэрэн иһэрин туһунан видео тарҕанан, үгүс киһи айманна.

Ол курдук, от ыйын 3 күнүгэр киэһэ 20:30 чааска   Дьокуускай полициятын бастакы нүөмэрдээх отделыгар   Ленин проспегар  баар  дьиэ таһыгар буолбут   түбэлтэ туһунан иһитиннэрии киирбит.  Полиция учаскуобайа  видеоҕа баар дьон кимнээх буолалларын быһааран,  быһылаан тахсыбыт  сиригэр тута тиийбит. Онно тиийбитигэр 94 саастаах дьахтар  доруобуйатын туруга мөлтөх буолан, суһал көмө биригээдэтэ ыҥырыллыбыт.

94 саастаах кырдьаҕас ийэтигэр сүөргү быһыыламмыт 60 саастаах уолун полиция отделыгар илдьибиттэр.  Уола кэпсээбитинэн, кырдьаҕас ыарыһах ийэтин көрөртөн сылайан, бэйэтин ыһыктынан кэбиһэн, куһаҕаннык сыһыаннаспыт диэн Ис дьыала министиэристибэтин пресс-сулууспата иһитиннэрдэ.