Владимир Ткачук «Азия оҕолорун» туһунан санаатын үллэһиннэ

Владимир Ткачук, 16 саастаах, «Азия оҕолоругар» Минскэй куораттан кэлэн кытынна.

Волейболунан дьарыктанар. «Азия оҕолоругар» кыттан баран санаатын үллэһиннэ.

— Күрэхтэһии хайдах ааста?

— Күрэхтэһии мин санаабар үчүгэйдик ааста. Интэриэһинэй. Хамаандалар бары олус күүстээхтэр. Биһиги турунан дьарыктаммыппыт,  ол иһин үчүгэй түмүгү ситистибит дии саныыбын.

— Долгуйуу баара дуо?

— Бастаан биллэн турар долгуйбутум. Ол гынан баран күрэхтэһии баран истэҕин аайы, долгуйарыҥ сыыйа тохтоон барар эбит.

— «Азия оҕолоро» оонньууларыгар хайдах бэлэмнэммиккиний?

— Күрэхтэһиигэ бэлэмнэниибит биир ый курдук буолбута, туспа спортивнай комплекска. Онно күҥҥэ иккитэ олус күүстээх эрчиллиилэр буолбуттара. Ол эрээри, сыалбытын барытын толордубут, үчүгэйдик кытынныбыт, бэлэмнэниибит таах ааспата.

— Хамаандаҕытыгар уопсайа хаһыаҕытый уонна хайа хамаандалары кытары кииристигит?

— Биһиги хамаандабытыгар 12 киһи кэлиилэр уонна 6 сүрүн. Бөлөхпүтүгэр Казахстаанныын оонньоотубут, Ураллааҕы федеральнай уокуругу, Уһук Илин, Саха сирин хамаандаларын кытары күөн көрүстүбүт.

— Уопсай санааҕын үллэстиэҥ дуо? «Азия оҕолоро» тэриллиитин сөбүлэтин дуо?

— Тэрээһин мин санаабар саамай үрдүк таһымҥа ааста. Бейджиктарынан эрэ киллэрэллэр эбит. Онно болҕомтобун уурдум. Уопсайбытыгар волонтердар сирдээн киллэрбиттэрэ. Уопсай дьиэ иһин эмиэ сөбүлээбитим, астара-үөллэрэ эмиэ үчүгэй.

— Оттон Дьокуускай куораты туох дии санаатыҥ? Сөбүлээтиҥ дуо уонна куорат кэрэхсэбиллээх сирдэригэр сырыттыгыт дуу?

— Куорат үчүгэй. Куоракка күүлэйдээтибит да, ураты кэрэ сирдэрин көрбөтөхпут. Мамонт музейын сөбүлээбитим. Волонтердар, тэрийээччилэр эмиэ элбэх араас аралдьытар бырагыраамалары оҥорбуттара, үҥкүүгэ сылдьыбыппыт.

— «Азия оҕолоругар» кэлин кыттар оҕолорго тугу сүбэлиэҥ этэй?

— Күүскэ кыһаллыахха наада. Эрдэттэн уһуннук бэлэмнэниэххэ. Туох баар кыһамньыгын ууруохтааххын уонна наһаа долгуйуо суохтааххын эбит. Оччоҕуна эрэ ситииһиилэниэххэ сөп.

Евгения Петрова