А.И. Бастрыкин тулаайах оҕолору дьиэнэн хааччыйыы боппуруоһун хонтуоруолга ылла

Арассыыйа Силиэстийэлиир кэмитиэтин бэрэссэдээтэлэ тулаайах оҕолору дьиэнэн хааччыйыы боппуруоһугар суһал сүбэ мунньаҕы ыытта.

А.И. Бастрыкин ВКС эрэсииминэн тулаайах оҕолору дьиэнэн-уотунан хааччыйыы эйгэтигэр буруйу оҥорууга территориальнай силиэстийэлиир уорганнарынан силиэстийэ үлэлэрэ хайдах баран иһэллэрин туоһуласта.

Сүбэ мунньахха тулаайах оҕолорго дьиэ-уот быраабын көмүскээһин уонна бырааптарын чөлүгэр түһэрии боппуруостара болҕомтоҕо ылыллаллара бэлиэтэннэ. Олор ортолоругар бүддьүөтү улаатыннарыы, бырагыраамалары ырытан оҥоруу, сэртипикээттэри биэрии кыһылаҕалары быһаарыы ситэтэ суоҕа ыйылынна.

Быйыл территориальнай силиэстийэлиир уорганнарынан дойду үрдүнэн тулаайах оҕолору дьиэнэн хааччыйыы бырааптарын олоххо киллэриигэ 249 буруйу оҥоруу бэлиэтэммит. Хоромньу суумата 172 мөлүйүөн солкуобай буолбут. Сүбэ мунньах кэмигэр бэрэссэдээтэл субъектар силиэстийэлиир управлениеларын салайааччыларын дакылааттарын иһиттэ.

Ол иһигэр Саха сиринээҕи Силиэстийэлиир кэмитиэтин салайааччыта В.В. Кондратенко бу хайысхаҕа үс холуобунай дьыала көбүтүллүбүтүн уонна тулаайах оҕолору дьиэнэн хааччыйыыга суут быһаарыыларын толорботохторун туһунан иһитиннэрдэ. Кини холуобунай дьыалалар суһаллык силиэстийэлэнэригэр, сотору кэминэн буруйдаахтар суут иннигэр туруохтара диэн эрэннэрдэ. Ону сэргэ тулаайах оҕолору кытта көрсүһүүлэр ыытыллыбыттарын туһунан кэпсээтэ.

Дакылааттары истэн баран, А.И. Бастрыкин тулаайахтар олорор бырааптарын кэһии чахчыларыгар процессуальнай үлэлэр ыытыллыбыттарын мөлтөҕүнэн аахта. Сүбэ мунньах түмүгүнэн кини сорох силиэстийэлиир управлениеларга кэккэ бэрэбиэркэлээһини ыытарга анаата уонна эрэгийиэн баһылыктарыгар тулаайах оҕолор бырааптарын эйгэтигэр кыһалҕаны суһаллык быһаарарга сорудахтаата.