Ааспыт сууккаҕа 8 ойуур баһаара умуруорулунна

Ааспыт сууккаҕа Саха сиригэр 20 тыһыынча гектар иэннээх 8 ойуур баһаара умуруорулунна, диэн брифиҥҥэ Экология, айылҕаны туһаныы уонна ойуур хаһаайыстыбатын миниистирин солбуйааччы Андрей Коноплев кэпсээтэ.

Баһаардар Алдан, Нерюнгри, Уус Маайа оройуоннарыгар, итиэннэ Дьокуускай куорат таһыгар тохтотуллубуттар. Ону кытта космостан уонна авиациянан кэтээн көрүүлэринэн 112 га сиргэ саҥа 8 ойуур баһаара күөдьүйэн таҕыспыта билиннэ. Суукка саҕаланыытыгар Абый, Алдан, Үөһээ Бүлүү, Бүлүү, Дьааҥы, Горнай, Эдьигээн, Кэбээйи, Ленскэй, Мииринэй, Нерюнгри, Ньурба , Сунтаар, Өлүөхүмэ уонна Уус Маайа оройуоннарыгар 72 ойуур баһаара баар.

Үөһээ Бүлүүгэ, Бүлүүгэ, Ньурбаҕа, Өлүөхүмэҕэ, Уус Маайаҕа уопсай иэнэ 31 тыһыынча га сирдээх 5 ойуур баһаара бохсуллан эрэр.

Уоту умуруорууга 1698 киһи, 139 тиэхиньикэ үлэлииллэр. Үөһээ Бүлүүгэ, Дьааҥыга, Горнайга күүһү-кыаҕы улаатыннараллар. Баһаары кэтииргэ 13 салгын аала, умуруорууга Ми-8 9 бөртөлүөт үлэлиир, диэн иһитиннэрэр СӨ Ил Дарханын уонна Бырабыыталыстыбатын пресс-сулууспата.