Ааспыт сууккаҕа Дьокуускай куоракка дьон эчэйиилээх 12 суол быһылаана таҕыста

Тохсунньу 13 күнүн сарсыардатыгар Ойуунускай уулуссатыгар тахсыбыт суол быһылааныгар 3 киһи эт-хаан араас эчэйиитин ылла диэн СӨ Суолга куттала суох буолуутун судаарыстыбаннай иниспиэксийэтэ иһитиннэрэр.

Оттон Петр Алексеев уулуссатын 60/1 №-дээх уонна Тимирязев уулуссатын 60-с №-дээх дьиэтин аттыгар 10 уонна 15 саастаах оҕолору, сатыы дьон массыына суолун сатыы сылдьарга анамматах сиринэн туораан истэхтэринэ массыыналар түҥнэри көппүттэр. Петр Алексеев уулуссатын 91к3 №-дээх дьиэтин аттыгар сатыы дьон массыына суолун сатыы сылдьарга анамматах сиринэн туораан испит 9 саастаах оҕону эмиэ массыына түҥнэри көппүт.

Суолу көҥүллэммэт сиринэн туораан иһэн массыына саахалыгар эчэйиилэри ылбыт оҕолор балыыһаҕа киирдилэр. Бу быһылааннарынан силиэстийэлэр ыытыллаллар.

Суолга куттал суох буолуутун судаарыстыбаннай иниспиэксийэтэ суоппардары сатыы дьон хаамарга көҥүллэммэт сирдэринэн туоруур түгэннэригэр ураты сэрэхтээх буолалларыгар, эрдэттэн бытааралларыгар ыҥырар. Ону тэҥэ суоппардар оҕолорго болҕомтолорун уураллара наадатын тоһоҕолоон бэлиэтииллэр. Оҕо быһыыта-майгыта ураты буолуон сөп, онон үөрэх кыһаларын, оҕо уһуйааннарын аттыларыгар, элбэх киһи мустубут сирдэригэр ордук сэрэхтээх буолуҥ.