ААҔААЧЧЫ СУРУГА: Бурятия хортуоппуйа

Быйыл хортуоппуй өлгөмнүк үүммүтүн туһунан олохтоохтор, тыа сирин оҕуруотчуттара кэпсииллэр.

Онон хортуоппуй сыаната наһаа өрө тахсыбат ини диэн ээр-сэмээр үөрэбит. Ардахха былдьаппатахха, үчүгэйдик хомуйдахха-харайдахха ааттаах ас буоллаҕа.
Ол эрээри, бу күннэргэ биир сонуну дьиктиргээн аахтым. Бурятия хортуоппуйун атыылыыр буолбуттар. Киилэтэ — 100 солкуобай. Буолумуна, билигин тимир суолунан элэҥнэччи таһан эрдэхтэрэ. Ол аата Бурятияҕа даҕаны хортуоппуй өлгөмнүк үүннэҕэ диэн сыаналыахха сөп. Онон куорат олохтоохторо атыылаһаргытыгар хайа дойду хортуоппуйа буоларын дьээбэҕэ ыйыталаһар буолуҥ.

Биирдэ эмэ кууһунан атыылыыр баазаларга сылдьан, хайа дойду хортуоппуйа буоларын туоһуластахха сорох атыыһыттар: “Билбэппит”, — дэһээччилэр. Алаас ааттаах дииллэринии, хортуоппуй даҕаны дойдулаах буоллаҕа.

Ас-үөл элбиирэ туох куһаҕаннаах буолуоҕай. Ол эрээри бэйэбит сирбитигэр-уоппутугар үүммүт оҕуруот аһа быдан амтаннаах, туһалаах буоллаҕа. Ону учуонайдар да этэллэрэ туоһулуур.

Сорох хаһаайыстыбалар оҕуруот аһын хомууругар дьону көмөҕө ыҥыралларын аахпытым. Холобура, 15 куул моркуобу хомуйбут киһиэхэ куул аҥаара моркуобу эбэтэр биир куул хортуоппуйу биэрэллэр эбит. Бу сөптөөх дьаһаныы дии санаатым.

Федоровтар.