Ааҕааччы суруга: Дьааҥы дьоруойдарын умнубат

Бүтүн Арассыыйатааҕы “Служение” бириэмийэҕэ Дьааҥы оройуонун Адыаччы нэһилиэгин урукку баһылыга, анал байыаннай дьайыыга сылдьан  ааспыт сыл ахсынньытыгар олоҕун толук уурбут Вячеслав Слепцов Саха сириттэн соҕотох номинант быһыытынан киирдэ. Куоластааһын “Госуслуги” куйаар ситимин порталын нөҥүө бу дьыл кулун тутар 31 күнүттэн муус устар 13 күнүгэр диэри буолуоҕа. 

Дьааҥы Алыһардааҕыттан төрүттээх Адыаччы нэһилиэгин умнуллубат аҕа баһылыга, “За укрепление боевого содружества” мэтээллээх байыаннай дьайыы бэтэрээнэ Слепцов Вячеслав Вячеславович хоту дойду хоһуун уола буоларын быһыытынан, оҕо эрдэҕиттэн сытыы-хотуу майгылаах  киһи этэ. Бэйэтин этинэн-хаанынан хоту дойду олоҕун-дьаһаҕын бэркэ көрө-билэ улаатан, толору сааһын ситээт да дьиэ кэргэн, оҕо-уруу тэринэр уонна икки эрэ илиитигэр бүүс-бүтүннүү эрэнэн икки мэндиэмэннээх дьиэ туттан киирэр.

Тыынар тыыннаах баарын тухары олох диэн учуутал, оттон киһи диэн сааһыттан тутулуга суох үйэлэргэ үөрэнээччи буоларын бэркэ билэн уонна ылынан туран ырааҕы уонна инникини быһа толкуйдуур биһиги уолбут Адыаччыны таһынан чугас нэһилиэктэргэ тиийэ оттор уонна тутууга туттуллар мас кэрдиитинэн, тиэйиитинэн дьарыктанар. Аҕыйах сыл иһигэр бэйэ үлэ дьыалатын ситиһиилээхтик тэринэн араас кыра техникаттан саҕалаан улахаҥҥа тиийэ атыылаһан үлэтин өҥөтүн, ыырын өссө кэҥэтэн биэрэр.

Кыра сааһыттан элбэх доҕордоох, атастаах Вячеслав Вячеславович быстала, өрөбүлэ суох үлэ үгэнигэр сылдьан билсэр, алтыһар дьоно сылтан сыл өссө элбиир. Ол курдук, дьиэ сылааһын хааччыйар оһох алдьархайыттан тахсыбыт биир сааскы кэм күрүлүүр күнүскүтүгэр олорор дьиэлэрэ ис өттө киһи инникитин сатаан олорбот буолуор диэри умайан, соһутан турардаах. Элбэх урусхалы көрсүһүннэрбит түгэнтэн чаҕыйбакка оччолорго отут сааһын да ситэ илик дьиэ кэргэн аҕата, хаһаайына биир кылгас сайын иһигэр эрэллээх атастарын кытта улахан дьиэ тутта охсон үктэнэргэ быһаарынар. Былааннаабыт сыалын-соругун толору ситээт эдэр ыал дьиэтин тиэргэнэ уруккутааҕар өссө улахан, киэҥ уонна тупсаҕай көстүүлэнэр.

Сотору кэминэн 2022 сыллаахха бүттүүн дойдубутугар  байыаннай дьайыыга хомуур саҕаланар. Биллэриллибит хомуурга Адыаччы нэһилиэгиттэн хабыллыбыт ытык иэстэрин толоро барар уолаттартан кини биирдэстэрэ буолбута. Төгүрүк сыл устата  байыаннай дьайыыга сылдьан сөптөөх түгэн тосхойдоҕун аайы өрүү ыһыктыбакка кэргэнигэр, оҕолоругар сибээскэ тахсара, кэпсэтэрэ. Кини Илиҥҥи байыаннай уокурук 5-с гвардейскай холбоһуктаах сэбилэниилээх аармыйа 60-с туспа мотострелковай батальонун штурмовой ротатын взводун отделениетыгар старшай стрелогунан сылдьыбыта.

Кэлэр 2023 сыл сайыныгар иккис дойду оҥостубут Адыаччытыгар аҕыйах кэмҥэ көҥүллээх эргиллэн, буолаары турар нэһилиэк баһылыгын быыбарыгар бэйэтин туруорунар. Бэйэтин үрдүк эппиэтинэстээх хаачыстыбаларын ыраатта норуотугар көрдөрбүт уонна ханнык да үлэҕэ таһаарыылааҕын дакаастаабыт киһи быһыытынан ааһан эрэр быыбарга мөккүөрэ суох кыайыылааҕынан тахсар. Саҥа үрдүк дуоһунаска олорон бастакы күннэриттэн саҕалаан бүттүүн нэһилиэккэ туһалаах сонун үлэлэри, сүүрээннэри киллэрэргэ толкуйдаабытынан, былааннаабытынан барар. Ол курдук, бэйэтин солбуйааччытын Саргылаана Стручковалыын күүстээх хамаанда тэринэн нэһилиэк күннээҕи олоҕор-дьаһаҕар көрсөр кыһалҕаларын туоратарга киэҥ далааһыннаахтык үлэлээбитинэн бараллар. Бастатан туран, түөлбэлэр үлэлэрин кытта ийэлэр, аҕалар түмсүүлэрэ сөргүтүллүбүттэрэ, саҥардыллыбыттара. Оттуллар маска, муус буор босхо тиэйиитигэр хаһааҥҥытааҕар да элбэх киһи, ыал нэһилиэккэ хабыллар гына анал субуотунньуктара ыытыллыбыттара. Кинилэр истэригэр сэрии бэтэрээннэрэ, сэрии оҕолоро, инбэлиит, соҕотох саастаах дьон о.д.а. араас социальнай ыарахан балаһыанньалаахтар киирбиттэрэ, өҥөнү туһаммыттара. Манна даҕатан эттэххэ, Вячеслав Слепцов өссө биир хаачыстыбата – бэйэтин кытта элбэх дьону батыһыннарар, иһитиннэрэр арыта хаһыс да сырыытын көстүбүтэ.

Биллэн турар, нэһилиэк баһылыгын үлэтэ түбүктээх, сүүрүүлээх-көтүүлээх. Адыаччы нэһилиэгэ номнуо хаһыс да уонунан сыллар устатын тухары биир сүрүн туруорсуулара – саҥа оскуола-саада уонна ититиини хааччыйар иккис киин хочуолунай тутуулара буолаллар. Эдэр баһылык Вячеслав Вячеславович бу улахан үлэлэр олоххо түргэнник киирэллэрин туһугар бастакы үлэтин күннэриттэн ыла араас көрсүһүүлэргэ, мунньахтарга кыттан хамнаппыта, ситиспитэ элбэх. Хас биирдии ситиһиитин, кыра да хамсааһыны нэһилиэнньэ дьонугар кэпсиирэ, үллэстэрэ.

Сыл саҕаланыаҕыттан ыла нэһилиэк, оройуон таһымнаах араас тэрээһиннэр, күрэхтэр кэннэ норуот хайҕабылын ылыан ылбыт аҕа баһылыкпыт ааспыт 2024 сылга Адыаччы нэһилиэгэ төрүттэммитэ 100 сыллаах үбүлүөйүгэр түбэһэр. Нэһилиэгим туһугар диэбитинэн туох баар санаатын-оноотун ууран туран Ыһыах ыытыллар нэһилиэк ипподромун чөлүгэр түһэриитин үлэтигэр күүстээхтик ылсарга сананар. Кылгас кэм иһигэр мас сиэрдийэтин бэлэмнээһинин уонна суорааһынын кытта ипподром ис-тас үлэтэ түмүктэнэ охсоллор. Болдьохтоох бириэмэҕэ от ыйын 6-7 күннэригэр нэһилиэккэ өргө диэри буолбатах, ыытыллыбатах улахан икки күннээх баһаам элбэх дьон кыттыылаах үбүлүөйдээх Ыһыах ыытыллыбытын дьон-сэргэ бэркэ диэн ахталлар, өйдүүллэр.

Анал байыаннай дьайыыттан ааспыт сыл устата кэлэ-бара сылдьан аҕа баһылыкпыт Адыаччытыгар бүтэһигин тыыннааҕар балаҕан ыйыгар сылдьыбыта. Бу кэннэ төттөрү тыыннаах эргиллибэтин сэрэйбит курдук аҕыйах да хонук иһигэр бөһүөлэк үлэтин-хамнаһын таһынан бэйэ дьиэтин-уотун ис-тас өттүгэр ситэ оҥоһуллубатах үлэлэрин тиһэҕэр диэри тиэрдэн баран дьол чороонун толорбут тэҥэ сирэйдээх төннүбүтэ. Нэһилиэк, оройуон, өрөспүүбүлүкэ кинини күүтэ хаалар…

Арай ааспыт 2024 сыл ахсынньы ыйын 29 күнүгэр аҕа баһылыкпыт Вячеслав Слепцов сырдык тыына быстыбытын туһунан иһилиннэ, куйаар социальнай ситимнэригэр соһуччу суругунан тарҕанна. Истибиппит түүл эрэ буоллун диэн көрдөһүөхпүтүн киһи хайдах даҕаны итэҕэйбэт, ылыммат илэ туруга буолан биэрдэ. Биир уопсай сүбэнэн-аманан, сөбүлэҥинэн бүттүүн оройуоҥҥа, нэһилиэккэ Саҥа Дьыллааҕы тэрээһиннэр тохтууллар. Саҥа 2025 сылы көрсөр маҥнайгы күннэригэр биллэриллибит кутурҕан күннэрэ ааспытын да кэннэ уһуга суох кутурҕан салгыы ыһыктыбакка салҕанан бара турбут курдуга. Ол курдук, тохсунньу 22 күнүгэр оройуон киинигэр – Баатаҕай бөһүөлэгэр, онтон тохсунньу 24 күнүгэр Адыаччыга быраһаайдаһыылар кэннэ тохсунньу 25 күнүгэр төрөөбүт Алыһардааҕын сиригэр-буоругар суолун сабар хаар түһүүлээх кистэммитэ.

Отут икки эрэ сааһыгар олохтон туораабыт Вячеслав Слепцов кини эрэ соҕотох бүттүүн дойдуга, өрөспүүбүлүкэҕэ, оройуоҥҥа, нэһилиэккэ анал байыаннай дьайыыга сылдьан дьоруойдуу охтубут аҕа баһылык аатын сүкпүтэ уонна сүгэн хаалар. Ити да иһин бүтүн Арассыыйатааҕы “Служение” II муниципальнай бириэмийэҕэ 41313 сайабылыанньаттан Саха сириттэн кини талыллан номинант буолбута саарбаҕа суох. Оройуон, нэһилиэк көҕүлээһиннэринэн кини сырдык кэриэһигэр олунньу ый 21-23 күннэригэр номнуо иккис төгүлүн оройуоннааҕы “Эдэр хоһуун кууруһа” диэн оскуола саастаах оҕолорго байыаннай-полевой хомуур ыытыллара былааннанар. Санатар эбит буоллахха, бастакы сырыытын ааспыт 2024 сыл балаҕан ыйын 9-10 күннэригэр аҕа баһылыкпыт Вячеслав Слепцов көҕүлээһининэн ыытыллыбыта. Ону таһынан муус устар ыйга эмиэ кини сырдык кэриэһигэр анаан оройуон олохтоох дьаһалталарын күүстээх, быһый, сымса үлэһиттэрин истэригэр аан бастакытын спартакиада ыытыллыаҕа.

Дьааҥы сирэ бэйэтин дьоруойдарын умнубат! Күн бүгүнүгэр диэри Адыаччы дьоно-сэргэтэ ытыктыыр, бөһүөлэк киинин Улуу Кыайыы скверигэр өйдөбүнньүк тааһа турар аҕа дойду улуу сэриитигэр кыттыыны ылбыт буойун Чириков Константин Васильевич диэн соҕотох дьоруойдаахпыт. Аны кинилиин сэргэ нэһилиэк, оройуон, өрөспүүбүлүкэ, бүтүн Арассыыйа киэн туттар киһитэ, биир дойдулаахпыт Слепцов Вячеслав Вячеславович курдук аат иккис дьоруой быһыытынан ааттана биллиэҕэ.

Туругурдун Дьааҥыга – дьоруой эр хоһуун уолаттар, туругурдун Дьааҥыга – Вячеслав Слепцов!

Константин КАЖЕНКИН, СӨ Суруйааччыларын сойууһун чилиэнэ, уопсастыбаннай кэрэспэдьиэн