Ааҕааччы суруга: Хотун Мааччыйа

Сахабыт сирин сайына быйыл аҕыйах куйаас күннэри бэлэхтээбитинэн туһанан, Аллараа Бэстээхтэн чугас сытар Хотун Мааччыйаҕа баран сынньанан астынан-дуоһуйан кэллибит.

Хотун Мааччыйа — кэрэ көстүүлээх сүүнэ улахан күөл. Манна дьон сынньанар, сөтүөлүүр гына ис-киирбэхтик оҥоһуллубут. Дьиэ кэргэнинэн, доҕоттордуун-атастардыын сынньанарга, айылҕалыын алтыһарга бэртээхэй миэстэ.

Күөлбүт уута ып-ыраас, сып-сылаас, күн уотугар сүүрүгэ дьэрэлийэ күлүмүрдүүр. Оҕо-аймах чаҕаан күлүүтэ, ууну чалбааттыыр тыаһа, хоптолор хаһыылара — барыта холбоһон, дьикти кэрэ муусука курдук иһиллэр. Манна аттракционнар үлэлииллэр. Горкалар, батуттар, бананнар “кэлиҥ хатааһылааҥ” диир курдук долгуҥҥа биэтэҥнэһэллэр.

Талбыт сиргэр балаакка туруоран, хас да хонуоххун сөп. Аскын бэйэҥ астанаҕын. Портативнай гаас билиитэҕин илдьэ кэлбит буоллаххына, алаадьы астаан аар айылҕаҕын арчылыыгын.

Хотун Мааччыйаҕа саамай кэрэ көстүү — киэһэ күн киириитэ. Күн, көмүс сардаҥаларынан оонньоон, аргыый аҕайдык киирэн саҕахха саһар. Ол кэмҥэ күөл уута оруосабай өҥнөнөр. Аҥаардас бу кэрэ, хатыламмат көстүүнү көрө Хотун Мааччыйаҕа кэлэ туруохха сөп!

Хотун Мааччыйаҕа

Мааччыйа Хотуҥҥа сынньанан,

Сөтүөлээн, кумаҕар сыламнаан,

Мин сэниэ ылынным, астынным,

Санаабын сааһылаан сайҕанным!

Аймахтар бу күөххэ мустаммыт,

Алгыстаах алаадьы астааммыт,

Бэс чагда салгынын тыынныбыт,

Бэрт диэнник сынньанан аастыбыт.

Оҕолор үөрдүлэр-көттүлэр,

«Күөл осуобай!» диэтилэр,

Уунан да «ытыһан» биэрдилэр

Уонна дьэ сапборду эртилэр!

Хоптолор эргийэ көтөллөр,

Хаһыытаан уубутун аймыыллар,

Хаһаайын курдуктуу тутталлар,

Харааптыы долгуҥҥа усталлар.

Ийэлэр, эбээлэр буоламмыт

Иэйиибит бастыҥын таламмыт,

Аһатар түбүккэ сылдьабыт,

Арчылыы, маанылыы сатыыбыт.

Мааччыйа Хотуҥҥа махтанан,

Бардыбыт биһиги айаннаан,

Мааччыйа эбээҕэ аат ааттаан,

Бу манна кэлиэхпит хатылаан!

Еле­на ПРО­КОПЬЕВА, Мэ­ҥэ Ха­ҥа­лас, “Там­мах­тар” а­йар хол­бо­һук