Ааҕааччы суруга: Күндү күтүөт

Хараҥа хоско ыарахан ыарыыга ылларан өлөөрү сытар ийэлэрэ алта кырачаан оҕотуттан — уонуттан эрэ тахсыбыт улахан уолун Бииктэри ыҥыран ылбыта. Алта күндү көмүс чыычаахтарын хаалларан өлөн эрэр ийэлэрэ барахсан кэриэс тылын эппитэ.

«Бырааттаргын, балыстаргын көрө сылдьаар. Икки атахтаахха атаҕастатар эрэ буолаайаххыный», — диэбитэ кырачаан Бииктэр өйүгэр сүппэттии хатаммыта. Ийэлэрэ барахсан өлбүтүн кэннэ аҕалара иккиһин кэргэннэммэтэҕэ. Алта оҕотун бэйэтэ соҕотоҕун үлэлээн сүһүөхтэригэр туруортаабыта, оҕолоро ийэ тапталын билбэккэ улааппыттара.

Улахан уол Бииктэр оскуолатын эрдэ быраҕан, сокуоннай сааһын туолбакка сылдьан аҕатыгар көмөлөһөн, холкуос арааһынай үлэтигэр үлэлииргэ күһэллибитэ. Ити курдук олох олуурдаах уонна очурдаах-чочурдаах суолун этэҥҥэ туораан, бары ыал буолан оҕо-уруу бөҕөтө буолан этэҥҥэ олороллор.

Бу кэпсиир киһим мин чугас аймаҕым буолар. Кини өссө сокуоннай сааһын туолбакка сылдьан, биһиги ийэбитин кытта бииргэ төрөөбүт, бэйэтиттэн аҕыйах сылынан аҕа Маайыс диэн эдьиийбитин кэргэн ылбыта. Бииктэр төһө даҕаны дьоруой буолбатар дьоруойдуу үлэлээбитэ. Өссө оскуолатын бүтэрэн салгыы үөрэммитэ буоллар улахан тойон буолара хааллаҕа. Айылҕаттан бэриллибит баһылыыр-көһүлүүр көрүҥэ, ыллыктаах ылыннарыылаах тыла өһө ону туоһулууллар.

Эдэр эрдэҕиттэн арааһынай үлэлэргэ үлэлээн кэллэ. Сылгыһыттаан да ылла, фирмаҕа сүөһү даҕаны көрдө. Оттон үлэтин үгэнигэр сырыттаҕына олохтоох салалта Бииктэри тиэхиньикэҕэ дьоҕурдааҕын, сыһыаннааҕын таба көрөн, биир эргэ МТЗ 50 диэн «Беларусь» тыраахтары туттарбыта. Ол тыраахтарынан бөһүөлэгин олохтоохторугар отторун-мастарын тиэйэн уо.д.а. араас атын үлэлэри бочуоттаах сынньалаҥҥа барыар диэри үтүө суобастаахтык үлэлээбитэ.

Кини хайа даҕаны үлэҕэ сырыттар ол үлэтин өссө хайдах гынан хаачыстыбатын тупсарар уонна онон оҥорон таһаарыыны элбэтэр туһунан толкуйдуура, ону олоххо киллэрэргэ туруорсар идэлээҕэ. Ону сорох салайааччылар сөбүлээбэттэр этэ. Холобура, эрэһиинэ көлүөһэлээх тыраахтарга элбэх таһаҕаһы состун диэн, эргэрэн быраҕыллыбыт ДТ тыраахтар тимир тиһиликтэрин олордубута. Сыбааркалыыр уонна да атын ыстаныактары сатаан туттара.

Бииктэр успуордунан утумнаахтык дьарыктаммыта буоллар эмиэ ситиһиилэниэ этэ. Ол курдук, кини аналлаах тириэньэргэ дьарыктаммакка, бэлэмнэммэккэ даҕаны, 32 киилэлээх гиирэни үөһээ быраҕан баран, сиргэ түһэрбэккэ хабан ылара.

Сойуус ыһыллыбытын эмиэ муударайдык, бэйэтэ туспа ураты идиэйэлэрдээх көрсүбүтэ. Ол курдук, чааһынай бас билиигэ бытарыйан барыыны, арыандаҕа арахсан үлэлээһини өйөөбүтэ. Кылгастык эттэххэ, былааска саҥа кэлбит салалтаны уруйдуу-айхаллыы көрсүбүтэ. Маны барытын өтө көрбүтэ. Барытын уопсайдааһын, холбооһун үчүгэйгэ тиэрпитин эрдэлээн өйдөөбүтэ уонна аһаҕастык дьоҥҥо кэпсиирэ.

Бииктэр уордьан, мэтээл ылбатаҕа. Биһиги Бииктэрбит онтон төрүт хомойбот. «Мин мэтээллэрим, уодьаннарым бу сылдьаллар», — диэн баран сиэннэрин диэки ыйар.

Арба, биири умнубуппун Бииктэр өссө ыллыыр талааннаах, үөрэммитэ уонна сайыннарбыта буоллар, улахан ырыаһыт буолара хааллаҕа. Кини онтон хомойбот. Кини суолун сиэннэрэ салгыыллар. Биир сиэнэ эһэтин батан ырыаһыт идэтигэр Дьокуускай куоракка үөрэнэр. Инженер идэлээх сиэн эмиэ баар.

Бииктэр түөрт оҕотуттан икки кыыһа — учууталлар. Оттон уолаттара бэйэтин батан — механизатордар. Дьэ, маннык киһи — биһиги күндү күтүөппүт — Виктор Петрович Алексеев.

Иван Сивцев-Бээди.