Ааҕааччы суруга: Онкология балыыһатыгар махтанабын

Хаһыат нөҥүө хайдах даҕаны маҥан халааттаах аанньалларбар махтаныах тустаахпын диэн санааттан суруйан эрэбин.

Балаҕан ыйыгар күүскэ ыалдьан, суһал көмө массыынатынан өрөспүүбүлүкэтээҕи балыыһаҕа киирбитим. Людмила Николаевна Игнатьева тута МРТ аппараакка түһэртэрэн, ­диагноз туруоран, онкологическай балыыһа гинекология отделениетыгар киллэрбитэ. Манна түргэн-тарҕан туттуулаах, билиилээх эдэркээн бы­­раастар илиилэригэр киирэн, икки төгүл ыарахан эпэрээссийэни ааспытым. Онон, бу күн сирин көрөн салгыы олорорбор турууласпыт отделение сэбиэдиссэйигэр Моника Сергеевна Стручковаҕа миэхэ тутатына сөптөөх диагноз туруоран эпэ­рээссийэлээбитигэр, гинеколог-онколог быраас Диана Николаевна Михайлова суһал көмөнү оҥорбутугар, хирург-онколог быраас Олеся Афанасьевна Лугинова иккис эпэрээссийэбин оҥорон, ол кэннэ көрөн-истэн этэҥҥэ буоларбар турууласпыттарыгар махтанабын.
Маны таһынан, күнүстэри-түүннэри хас биирдии ыарыһаҕы эпэрээссийэ кэнниттэн эмтээн-томтоон үтүөрдэн таһаарбыт бары сиэстэрэлэргэ, минньигэс астаах асчыттарга барҕа махтал тылларбын тиэрдэбин. Кинилэр баар буолан ыарахан ыарыыттан босхолонон, этэҥҥэ дьиэбэр тахсан олордоҕум.
Эһиги үлэҕитин үрдүктүк сыаналааһын бэлиэтинэн үтүөрдүбүт, атахтарыгар туруорбут дьоҥҥут дьоллоох сирэйдэрэ буолар. Талан ылбыт идэҕитигэр бэриниигит, дьоҥҥо истиҥ, үтүө сыһыаҥҥыт иһин махтанабын. Бэйэҕит күүскүтүгэр эрэл, билиигит, уопуккут өссө да үрдүк сити­һиилэри аҕала турдун!
Ил Дархаммыт Айсен Николаев дьаһалынан, бу сотору кэминэн онкология балыыһата баараҕай тутуулаах дьиэ­ҕэ көһөөрү турарыттан астынабыт эрэ. Онон, сиэттэрэн этиэм этэ, бу сайдыылаах олоххо туох­тан да толлубакка, билиигитин өссө хаҥатан, ыарыһахтары атахтарыгар туруоран, кинилэр махталларын ыла туруҥ. Дьиэ кэргэҥҥитигэр дьолу-саргыны, барыта этэҥҥэ буолууну баҕарабын.

Вера ВЛАДИМИРОВА,

Дьокуускай