Хаартыска: ааптар тиксэриитэ
Муус устарга Астана куоракка Казахстан Өрөспүүбүлүкэтин Национальнай түмэлигэр “Саха сирин күндү кылаата” диэн Саха сирин норуоттарын ускуустубатын уонна култууратын быыстапката буолбута.
Экспозицияҕа кэлбит дьон саха норуотун ураты ускуустубатын, үгэс буолбут култууратын билистилэр. Быыстапкаҕа туспа миэстэ Саха Өрөспүүбүлүкэтин норуодунай худуоһунньуга Анна Зверева бырайыагынан «Культ коня в культуре народов Евразии» экспозицияҕа бэриллиннэ. Манна биһиги биир дойдулаахпыт, СӨ норуотун маастара Дарья Константинова, ат симэҕинэн кытынна. Кини Казахстан национальнай түмэлигэр көрсүһүүгэ казах поэтессата Турсынай Оразбаеваны кытары биир көрсүһүүтүн туһунан кэпсээтэ.
Ол 1983 сыллаахха, Саха сиригэр Казах Өрөспүүбүлүкэтин литературатын күннэрэ ыытыллар кэмнэрэ этэ. Ыалдьыттар дэлэгээссийэлэригэр бэйиэт, Казахстан уонна Сэбиэскэй сойуус Суруйааччыларын сойуустарын чилиэнэ Турсынай Оразбаева баара. Дэлэгээссийэ дьоно Хаҥалас улууһун кэрэ-бэлиэ сиригэр – Хачыкаат нэһилиэгин Булууһугар сылдьыбыта. Хаҥалас айылҕатын кэрэтиттэн, Булуус күөл хаар маҥан мууһуттан оҕолуу долгуйбут Турсынай Оразбаева Дарья Константиноваҕа казах омук үрүҥ көмүс бөҕөҕүн бэлэхтээбитэ. Ол көрсүһүүттэн ыла 40-тан тахса сыл ааста. Онтон Дарья Гаврильевна Турсынай кэриэһигэр ити дьахтар киэргэлин хараҕын харатын курдук харыстаан илдьэ сылдьар. Дарья Гаврильевна быйыл Саха сирин дэлэгээссийэтигэр киирсэн, поэтесса дойдутугар сырытта.
Турсынай Оразбаевна Оразбаева көхтөөх уопсастыбаннай диэйэтэл этэ, Арассыыйаҕа казах диаспоратын олоҕор-дьаһаҕар, үлэтигэр-хамнаһыгар улахан кылаатын киллэрбитэ. Кини — поэзия тоҕус хомуурунньугун (икки – нууччалыы, биир – сахалыы, биир – тувинныы) ааптара. Саха култууратын уонна литературатын киэҥник сырдаппытын иһин Саха Өрөспүүбүлүкэтин култууратын үтүөлээх үлэһитин үрдүк аатын ылбыта. Турсынай Оразбаева Суорун Омоллоон литератураҕа “кыыһа” этэ уонна “Мин кэллим Тааттаҕа” ырыа ааптара.
Галина СЕМЕНОВА
Психолог сүбэтэ Ксения Ивашковская – Психоневрология өрөспүүбүлүкэтээҕи диспансерын килиниичэскэй психолога, дьиэ кэргэн психолога, консультант,…
Байыаннай дьайыы саҕаланыаҕыттан амарах санаалаах дьон, волонтердар күүс-көмө буолаллар, үгүстэрэ бэйэлэрин сүрүн үлэлэрин таһынан. Госпиталларга…
Өлүөнэ эбэ мууһа Кэбээйи, Нам, Уус Алдан улуустарынан устар. Нам улууһун сиригэр-уотугар 08:00 ч. иһитиннэриинэн,…
Нам улууһугар сааскы халаан уутуттан эмсэҕэлээбит нэһилиэнньэлээх пууннарга уу таһымын туһунан улуус дьаһалтатын пресс-сулууспата иһитиннэрэр.…
Улуу Кыайыы 79 сылынан Уус Алдан улууһун Суотту нэһилиэгэ ытык кырдьаҕастарыгар ас-үөл наборун туттарда. Ону…
Тыа хаһаайыстыбатыгар үүт туттарыы – тыын боппуруос. Үүт туттарыллан үрүҥ-ас дэлэйэр, олохтоох аспытын-үөлбүтүн аһыыбыт, дьон…