Ааҕааччы суруга: Виктор Дмитриев рекорд олохтообута 40 сыла буолла

Рекордсмен отчут Виктор Серафимович Дмитриев республикаҕа олохтообут рекорда 40 сыла туолуутун көрсө.                    

Тыа сирэ — омук дьылҕата, тыа хаһаайыстыбатын сайыннарыы — тус сорукпут диэн лозунг курдук этиилэр элбэхтик суруллар, саҥарыллар буоллулар. Уопсастыбаннас күүскэ хамсаан, элбэх киһилээх, хорутуулаах  кэпсэтиилээх, салҕанар уохтаах улахан форум буолан ааста. Олохпут сайдар суола күүрүүлээх үлэҕэ ыччаты тардыы, тыа сирин диэки салайыы диэн буолар. Күн-дьыл буоллаҕына, ханна да тохтоло суох көмүөл мууһун курдук иннин диэки курдьэн иһэр, күн-сыл элэҥнээн олорор. 

Күүтүүлээх от ыйа, оппут үлэтэ тиийэн кэллэ. Маныаха бэлэмнэнэн, аҕа көлүөнэ сүбэ-соргу кэриэтэ санаатын этэн, үлэтин опытын санатан суолдьут сулус оҥостоллоругар кыаҕы биэрэр.

Быйыл бэйэтин кэмигэр үлэтин түмүгүнэн элбэхтик аатырбыт “Ньурба” совхоз туруу үлэһитэ, республика биллиилээх рекордсмен отчута, тракторнай звено салайааччыта  Виктор Серафимович Дмитриев  оттооһуҥҥа рекорд олохтообута 40 сылын туолар. 1984 сыллааҕы сайын  атырдьах ыйын 25 күнүгэр 1629 тонна оту оттоон, хас биирдии киһитигэр 229 тонна  оттонон республика рекордун олохтообута. Бу икки ыйга тиийбэт кэмҥэ сөҕүмэр көрдөрүү. Өссө салгыы В.С. Дмитриев звенота «Сүлэ» совхозка  арендалаһан күһүнүгэр  758 тонна оту оттообута. Онон бу биир сайын устата уопсайа 2387 тонна бастыҥ хаачыстыбалаах от оттоммута. Бу маннык оттооһун биир эрэ сыллаах буолбатах, сылтан сыл дойдуга ыытыллыбыт политика түмүгэр совхоз эстиэр диэри салҕаммыта. Сарсыарда эрдэттэн ыкса киэһэриэр диэри үлэ биир өрөбүл күнэ суох, тохтоло суох барара. Күһэйии түмүгэ буолбатах, били хоһооҥҥо хоһулларын курдук:

Сибэкки күн диэки хайыһар,

Дьон-сэргэ үтүөҕэ тардыһар,

Бил балык былдьаһар дириҥҥэ,

Мохсоҕол – көҕөрөр мөҥүөҥҥэ.

Уһун сыллар усталарыгар үлэлэрин түмүгүн үтүө дууһаларынан, чэрдээх илиилэринэн тугу да аахсыбакка туран үлэлээн  ситистэхтэрэ. От ыйын куйааһын тулуйан, ип-итии трактор кабинатын иһигэр олорон, күнтэн күн туруулаһан үлэлээһин бэйэтэ туспа героизм. Үлэҕэ маннык дьүккүөр, тулуур, дьулуур баар буолан,  бэйэлэрин сыраларын-сылбаларын, күүстэрин-уохтарын биэрэн, харыларын ньыппарынан баран үлэлээн, Виктор Серафимович республика киэн тутар, ытыктанар   бастыҥтан бастыҥ үлэлээх рекордсмен отчута аатырдаҕа. Ханнык баҕарар үлэҕэ сирдьит курдук лидер баһылыыр-көһүлүүр, салайар, бэрээдэги тутар, хамсатар оруола улахан. Оннук киһини Дмитриев Виктор Серафимовиһы звено сөпкө талан, баһылык оҥостон өрүү үрдүк ситиһиилэннэҕэ, онон Ньурба оройуона, “Ньурба” совхоһа, Саха сирэ сайдарыгар төһүү күүс буоллахтара. Дэлэҕэ даҕаны, Антоновка, Ньурба дьоно Виктор Серафимовиһы “сулуһа суох Үлэ Геройа” диэхтэрэ дуо. Буолуо да буолуо дьиҥнээхтии, ону оччотооҕуга коммунист партия чилиэнэ буолартан аккаастаммыта мэһэйдээтэҕэ.

Этэргэ дылы, кэскиллээх ситиһиилээх үлэ эдэр ыччат ыарахаттартан саллыбакка күүстээх үлэни өрө тутарыгар, үлэ үтүө үгэстэригэр уһуйуллуутугар  Виктор Серафимович Дмитриев салайааччылаах звено үлэтин үтүө холобура элбэххэ үөрэтэр, хаһан да өлбөөдүйбэт. Оттон ыччаты үлэҕэ үөрэтии — барыбыт ытык иэспит.

Васильева Капитолина Николаевна,

Улуус Бочуоттаах олохтооҕо