Ааҕааччы суруга: Үс үөрүү

Улуу Кыайыы 80 сыллаах үбүлүөйэ ньиргийэн ааста. Инним кылгаабыт, кэнним уһаабыт киһи быһыытынан, Саха сирин сүрүн хаһыатын нөҥүө санаабын үллэстиэхпин баҕардым.

Аан бастакы үөрүүм: Ил Дархаммыт сэрии кэмин оҕолорун умнубата, үбүлүөйдээх мэтээлинэн эҕэрдэлээн, үөртэ.

Иккис үөрүүм: “Мясной двор” маҕаһыын (салайааччы Петров Спартак Иванович) үһүс сылын сэрии кэмин оҕолоругар ас бородууксуйатын бэлэх уунар эбээт! Дьэ, бу хайдахтаах курдук хайҕаллаах дьыаланый? Үтүө санаатын, сүрэҕин сылааһын иһин кырдьаҕастар ааттарыттан махтал тыллары этэбин! Уолбут, оҕобут, уһун дьоллоох олоҕу олордун, оҕолоро эмиэ аҕаларын курдук амарах сүрэхтээх, үтүө дьон буоллуннар!

Дзержинскэй уулуссатыгар турар маҕаһыыныгар бэйэтин курдук сүрдээх эйэҕэс кыргыттар үлэлииллэр. Кырдьаҕас киһини олох билбэт дьоҥҥуттан эйэҕэс сыһыан наһаа үөрдэр ээ.

Үһүс үөрүүм: Кыайыы болуоссатыгар сылдьан, кэнсиэртэри көрөн кэллим. Сэрии саҕанааҕы, уостан түспэт ырыалар, сыанаҕа сэрии кэмнэриттэн уһуллубут каадырдаах, кэнсиэри тупсардылар. Кыра оҕолортон саҕалаан, устудьуоннарга тиийэ, Өксөкүлээх киинин үлэһиттэрэ, араас омуктар сэриигэ оруолларын көрдөрдүлэр.

Мин сахам ыччаттарыттан наһаа үөрдүм, ити аата ыччат олоххо көхтөөх сыһыаннаммыт. Устуоруйаны, ол кэми уһансыбыт кырдьаҕастары ытыктыырын бэлиэтээтим. Өрөспүүбүлүкэ да күнүгэр бэлиэтии көрбүтүм. Наһаа маладьыастар!

Кыра хом санаам: уокуруктар уу-чуумпулар, утуйа сыталлар дии санаатым. Уокуруктар маҕаһыыннарын иһин-таһын киэргэтэр Кыайыы туһунан былакааттар, луоһуннар олох кэмчилэрин сөхтүм. Былыргы курдук, сэрии саҕанааҕы ырыаларын-тойуктарын таһырдьа тардан кэбиспиттэрэ буоллар.

Дьэ, ити курдук Улуу Кыайыы 80 сылын бэлиэтээн, үөрэн олоробун.

Марина Степановна Иванова, үлэ бэтэрээнэ.