Салгыы
Ааҕааччылардыын ситим быстыбат

Ааҕааччылардыын ситим быстыбат

22.04.2023, 17:49
Хаартыска: суруналыыстар бэйэлэрин түһэриилэрэ
Бөлөххө киир:

Өрөспүүбүлүкэтээҕи «Саха сирэ» хаһыат үлэһиттэрэ Горнай улууһун Бэрдьигэстээх уонна Мытаах нэһилиэктэригэр сылдьан, ааҕааччыларын кытары көрүстүлэр уонна чэпчэтиилээх сурутууну ыыттылар. 

Муус устар 20 күнүгэр Мытаахтааҕы Сынньалаҥ киинигэр буолбут көрсүһүүгэ хаһыат кылаабынай эрэдээктэрэ Александр Тарасов, эрэдээктэри солбуйааччы Анивера Акимова, суруналыыстар Ангелина Васильева уонна Надежда Егорова кытыннылар. Кинилэр «Саха сирэ» хаһыат устуоруйатыттан саҕалаан, хаһыат бүгүҥҥү туругун, анал бырайыактарын, «Саха сирэ» сайт уонна «Сахамедиахолдинг» ыытар үлэлэрин  кэпсээтилэр. Арассыыйа уонна өрөспүүбүлүкэ Суруйааччыларын сойуустарын чилиэннэрэ Ангелина Васильева-Дайыына уонна Надежда Егорова-Намылы «»Саха сирэ» хаһыат суруйааччы кыргыттара»  бырайыак чэрчитинэн, айар үлэлэрин билиһиннэрдилэр.  Анивера Акимова хаһыат кэлэктиибэ элбэх ийэлээх оҕолорго анаан таһаарбыт «Ийэ баар бу сиргэ – аан дойду аанньала» уонна анал байыаннай эпэрээссийэ сылдьар уолаттарга анаммыт хоһоон куонкуруһун кыайыылаахтарын хомуурунньугун уо.д.а атын кинигэлэри бибилэтиэкэ ааҕааччыларыгар бэлэхтээтэ.  Кэлбит дьон биктэриинэҕэ кыттан, кыайыылаахтар анал бириистэринэн наҕараадаланнылар,  хаһыакка суруйтарбыт дьоҥҥо сүүйүүлээх лотерея оонньонно. Онтон Ангелина Васильева доруобай аһылык, чөл олох туһунан хаһыакка тахсыбыт матырыйаалларыгар олоҕуран, интэриэһинэй лиэксийэни ааҕан, ааҕааччылар сэҥээриилэрин ылла.


Биллэрин курдук, Мытаахха кэлбит киһи Мытаахтааҕы Сынньалаҥ киинигэр сылдьыбакка төннүбэт. Бу улахан уораҕайга Саха сирин норуодунайдара, ини-бии суруйааччылар Семен уонна Софрон Даниловтарга аналлаах саалалар, кэбиниэттэр уонна ССРС норуодунай худуоһунньуга Афанасий Осипов хартыыналарын галереята бааллар.  2019 сылтан үлэҕэ киирбит,  өрөспүүбүлүкэҕэ, дойдуга киэҥник сураҕырар мусуой-галереяны  илэ харахпытынан көрөн-истэн,  нэһилиэк баһылыга Иван Петровка уонна мусуой салайааччыта Артур Егоровка махталбытын биллэрдибит.


Эбиэт кэннэ Бэрдьигэстээх сэлиэнньэтигэр П.Д. Аввакумов аатынан Киин бибилэтиэкэҕэ улуустааҕы «Сыккыс» литературнай түмсүү кыттыылаахтарын кытары  көрсүһүү буолла. Бибилэтиэкэ ааҕар саалатыгар баар быыстапкаҕа  бу түмсүү таһаарыылаахтык үлэлии-хамсыы олорорун, элбэх айар киһи тус кинигэтэ уонна түмсүү хомуурунньуктара, сурунааллара бэчээттэммиттэрин, өрөспүүбүлүкэ хаһыаттарыгар уонна сурунаалларыгар кинилэр тустарынан элбэх матырыйаал тахсыбытын сөҕө-махтайа уонна биһирии көрдүбүт.


Түмсүүнү сэттис сылын салайа сылдьар Айталина Олесова-Айталыына кылгастык түмсүү туһунан билиһиннэрдэ. «Сыккыс» түмсүү тэриллибитэ хайыы үйэ 40-ча сыл буолбут. Улуустааҕы киин бибилэтиэкэни уонна өрөспүүбүлүкэ улуустарын түмсүүлэрин кытары ыкса сибээстээхтик үлэлииллэр. Былырыын, Семен уонна Софрон Даниловтар үбүлүөйдээх сылларыгар улуус биллэрбит бырайыагар «Ферма кыргыттара» диэн бырайыактарынан кыттан,  Грант ылбыттар. Онон, Семен Данилов «Ферма кыргыттара» хоһооно айыллыбыт сиригэр, Үс көлүйэҕэ өйдөбүнньүк бэлиэ туруорбуттар.


Суруналыыстар салҕыы 17-с сылын тохтообокко үлэлии олорор улуустааҕы «Дабаан» араадьыйаҕа ыҥырыллан, ыытааччы Нина Сутакова-Айылҕаана сэргэх кэпсэтиини ыытта.
Горнайдар хаһыат үлэһиттэрэ инникитин даҕаны маннык көрсүһүүлэри тиһигин быспакка ыыта туралларыгар баҕардылар уонна хаһыат страницаларыгар ким-туох, ханнык тиэмэ сырдатыллыан сөбүгэр санааларын үллэһиннилэр.

+1
0
+1
0
+1
0
+1
0
+1
0
+1
0
+1
0
Бары сонуннар
Салгыы
20 июля
  • 18°C
  • Ощущается: 18°Влажность: 68% Скорость ветра: 2 м/с

Сообщить об опечатке

Текст, который будет отправлен нашим редакторам: