«Ааҕар Арассыыйа» чэрчитинэн кинигэ быыстапката ыытыллыаҕа

Алтынньы 6-8 күннэригэр Уһук Илин Федеральнай уокурукка кинигэни ааҕыыга аналлаах улахан тэрээһин ыытыллара күүтүллэр.

Ол курдук, бу күннэргэ Владивосток куоракка «Красная площадь.Дальний Восток» кинигэ бэстибээлэ ыытыллыаҕа.

Бырайыак «Ааҕар Арассыыйа» диэн федеральнай бырагыраама чэрчитинэн ыытыллар. Сүрүн соруга — киэҥ араҥаны ааҕыы эйгэтигэр угуйуу. Кинигэ быыстапка-дьаарбаҥката сыл ахсын ыытыллар бырайыакка кубулуйуохтаах. Алтынньыга бырайыак бастакы түһүмэҕэ саҕаланар.  Тэрээһин РФ цифровой сайдыы, сибээс уонна маассабай коммуникациялар министиэристибэлэрин, Приморскай кыраай бырабыыталыстыбатын, култуура уонна архыып дьыалаларыгар министиэристибэтин өйөбүллэринэн ыытыллар.

Дьаарбаҥка-быыстапкаҕа уопсайа 110 кинигэ кыһалара Москваттан, Санкт-Петербургтан, Владивостоктан о.д.а Арассыыйа куораттарыттан кыттыахтара.  Үс күннээх бэстибээлгэ уопсайа 60 тэрээһин ыытыллыаҕа.  Ол курдук суруйааччылардыын көрсүһүү, саҥа кинигэлэр сүрэхтэниилэрэ, кинигэ атыыта-тутуута, төгүрүк остуоллар ыытыллыахтара.