Ааһан иһэр киһини чалбаҕынан ыспыт суоппарга туох миэрэ ылылларый?

Ааҕааччыларбыт ыйытыыларынан сатыы киһини чалбаҕынан ыспыт суоппарга туох миэрэ ылылларын туһунан билиһиннэрэбит.

Маннык түгэннэр суол быһылаанынан ааҕыллаллар. Ол эрээри ГАИ үлэһиттэрэ, биллэн турар, итинник үҥсүүлэргэ тутатына тиийбэттэр. Арай эмсэҕэлээччи интэриэһин атыннык көмүскэнэр кыахтаах. Сокуон ирдэбилинэн киһи баайын-дуолун алдьатыы, киртитии иһин 300-500 солк. суумалаах ыстараап көрүллэр. Оттон хоромньу суумата 5000 солк. куоһарар түгэнигэр, холуобунай дьыала көбүтүллэр.

Буруйдаах суоппар икки сылга диэри көҥүлэ быһыллыан сөп. Өскөтүн болҕомтото суох суоппар чалбаҕынан ыстаҕына, массыына судаарыстыбаннай нүөмэрин, мааркатын уонна өҥүн бэлиэтии көрөн сокуон хараҕынан эппиэтинэскэ тардыахха сөп. Ол туһугар сайабалыанньаны ГАИ, полиция отделларыгар уонна оройуоннааҕы суут көрүүтүгэр ыытаҕыт. Буруйдааҕы эппиэтинэскэ тардар туһугар сөптөөх дакаастабылы хомуйуҥ, наада буоллаҕына юристар өҥөлөрүнэн туһаныҥ диэн эспиэрдэр сүбэлииллэр.

Тугу бэлэмниибит?

• — видеоҕа эбэтэр хаартыскаҕа түһэриҥ. Куорат пабликтарыгар, атын социальнай ситимнэригэр суруйуҥ, тахсыбыт быһыы-майгы туһунан сиһилии быһаарыҥ, ханна уонна ханнык кэмҥэ быһылаан тахсыбытын ыйыҥ;
• — Туоһулар баар буоллахтарына эбэтэр көһүннэхтэринэ туоһу буоларга көрдөһүҥ;
• — Дакаастабылга киртийбит, алдьаммыт мал-сал, таҥас- сап сыанатын туоһулуур чиэктэри хомуйуҥ.

Өскөтүн суоппар буруйу оҥоруута дакаастаннаҕына, РФ Административнай Кодексатынан «Кыра күлүгээннээһин» ыстатыйатынан суоппар 500-1000 солк. ыстарааптанар эбэтэр 15 сууккаҕа көҥүлэ быһыллар.

Сорох түгэннэргэ күлүгээннэргэ ылыллар миэрэ күүһүрэн биэрэр. Холобур, Уһук Илин биир киин куоратыгар массыына суоппара «Lexus» массыынанан ааһан иһэр киһини соруйан чалбаҕынан ыһан, 80 000 солк. суумаҕа ыстарааптаммыта биллэр.