Аахсыы эрэ кэнниттэн киһи кырдьыгын булара хомолтолоох

Олорор дьиэм бассаап* (признана экстремисткой организацией, ее деятельность запрещена в России)  бөлөҕөр ыҥырыа уйатын тардыбыт курдук айдаан. Айдаан барыта тохсунньу ыйга ааҕыллыбыт ититии иһин төлөбүр тула буолла. Сорох дьоҥҥо ыйга кыбартыыра төлөбүрүн таһынан ититии уонна сылаас уу иһин 14 тыһыынча солк. ааҕыллыбыт.

Ититии иһин төлөбүрү «Теплоэнергия» бассаап бөлөҕөр ыытабыт. Ый ахсын олус бэрээдэктээхтик учуотчутум көрдөрүүлэрин кэмигэр ыыта олорон, арай соһуччу маннык суругу теплоэнергиялартан туттум: «Эһиги ахсынньы ыйдааҕы көрдөрүүгүтүн ыыппатаххытын иһин нуорманан аахтыбыт», — диэбиттэр. Мин бассаапка*, хата, барытын эрдэ скриннаан ылбыт көрдөрүүлэрбин, ону кинилэр «сөп, туттубут» диэн эппиэттэрин барытын олоччу утары ыыттым. Ол эрээри кинилэр бассаабы көрбөтүлэр. Төлөпүөҥҥэ эрийдэххэ ылбаттар.

Ыксал быыһыгар таксыы ыҥыран, Ксенофонт Уткин уулуссатын 20-с №-дээх аадырыска тиийдим.  Үс кассир үлэлээн тиигинэтэ олороллор. Уочарат  суох. Балаһыанньабын быһаардым, скрины көрдөрөбүн. Онуоха: «Эн көрдөрүүгүн ыыппыт кэмҥэр бырагыраамабыт ыһыллан ылбыт буолуон сөп, ол иһин киирбэтэх, билигин ааҕан көрүөхпүт», — диэтилэр. Ол эрээри ааҕан көрдөхтөрүнэ, мин суоттаабыппынан, нуорманан ылбыттара көстөр. Кинилэр хайдах суоттаабыттарын хос-хос быһаараллар, эн көрдөрүүгүн ыыппатах буолаҥҥын маннык тахсыбыт дииллэр. Мин айдааран туран көрдөрүүбүн киллэртэрдим.

Арай, маннык балыйтарбыт аҕам саастаах киһи кырдьыгын хайдах булар? Бассаап* ситиминэн ылар көрдөрүүлэр скриннарын сотторбот ордук. Ханнык да түгэҥҥэ биһиги ордук хос төлүө суохтаахпыт. Хайаан даҕаны аахсыы, быһаарсыы эрэ кэнниттэн киһи кырдьыгын булара  хомолтолоох. Дьону кытта үлэлиир тэрилтэлэр төлөпүөҥҥэ холкутук эппиэттиир эбээһинэстээхтэр. Билигин урукку курдук касса иннигэр атыыр уочарат субуруйбат. Дьон үксэ төлөпүөн нөҥүө төлүүр.

(*признана экстремисткой организацией, ее деятельность запрещена в России)