Аан бастакытын дьахталлар биэнсийэлэрин орто кээмэйэ эр дьон киэниттэн үрдээтэ

Дойдуга 2015 сылтан ыла аан бастакытын дьахталлар эр дьоннооҕор үрдүк биэнсийэни ылар буоллулар. Бу сыл тохсунньу 1 күнүнээҕи туругунан, дьахталлар анаммыт биэнсийэлэрин орто кээмэйэ 221 солк.үрдүк буолла. Бу туһунан Росстат пресс-сулууспата суруйар.

«2025 сыл тохсунньу 1 күнүнээҕи дааннайынан, дьахталлар биэнсийэлэрин орто кээмэйэ 23 249 солк. буолла, оттон эр дьоҥҥо — 23 028 солк. Бу иннинэ бары сылларга эр дьон биэнсийэтин кээмэйэ үрдүк этэ. 2015 сылтан саҕалаан дьахталлар ортотунан 10 663 солк. оттон эр дьон — 11 346 солк. ылаллара», — диэн Росстат дааннайдарыгар олоҕуран ТАСС иһитиннэрэр.

2024 сыллаахха дьахталлар ортотунан 20 745 солк., оттон эр дьон — 20 854 солк. ылаллара. Ол аата, сыл иһигэр дьахталлар биэнсийэлэрэ түргэнник улааппыт. Маны таһынан, отчуоттарга куорат биэнсийэлээхтэрэ тыа сиринээҕэр элбэҕи ылаллара бэлиэтэнэр: 2025 сыл саҕаланыытыгар куоракка — 24 005 солк., оттон тыа сиригэр — 20 722 солк. Урут 2025 сыллаахха РФ Социальнай пуондата дойду үрдүнэн биэнсийэ орто кээмэйэ 23 453 солк. тиийбитин, сыл иһигэр 2,5 тыһ.солк. үрдээбитин иһитиннэрбитэ. 2025 сыл тохсунньутуттан страховой биэнсийэлэр 7,3% үрдээтилэр, оттон салгыы өссө 9,5% үрдэтэр былааннаахтар. Маны таһынан, 2026 сылтан страховой биэнсийэ индексацията сылга иккитэ ыытыллыаҕа, оттон үлэлиир биэнсийэлээхтэргэ төлөбүр индексациятын сөргүтэр былааннаахтар.