Аан дойду абсолютнай чөмпүйүөнэ эдэр мадьыныга хоттордо

Баһылай Манчаары аатынан «Модун» успуорт национальнай көрүҥнэрин киинигэр Федор Дегтярев аатынан СӨ мас-рестлиҥҥэ абсолютнай чөмпүйэнээт уолаттарга, дьахталларга уонна эр дьоҥҥо ананна.

Хотторуу бастакы хомолтотун бу сыл аан дойду абсолютнай чөмпүйүөнэ, 170 киилэлээх Евгений Попов биллэ. Кини Нам улууһуттан эдэр мадьыны Денис Федоровка 1:2 ахсаанынан хоттордо.

Салгыы Денис полуфиналга норуоттар икки ардыларынааҕы кылаастаах успуорт маастара Сергей Фролкиҥҥа (Томпо улууһа) хотторон кэбистэ. Оттон Саха сирин абсолютнай чөмпүйүөнүнэн Үөһээ Бүлүүттэн Эрчим Баппаҕай (В. Гороховы, И. Федоровы кыайда), финалга Фролкины (2:1) хотто. Үһүс миэстэ Иннокентий Федоровка тигистэ.

Эр дьоҥҥо 75 киилэҕэ диэри ыйааһыҥҥа кыайыылааҕынан Валерий Никаноров (Мэҥэ Хаҥалас улууһа) буолла, дьахталларга аан дойду икки төгүллээх абсолютнай чөмпүйүөнэ Татьяна Баишева эрэллээхтик кыайда. Уолаттарга «абсолютнай» кыайыылааҕынан Александр Крюков (Амма) таҕыста.