Аан дойду иккис уоттаах сэриитэ түмүктэммитэ үбүлүөйдээх 79 сылын туолла

Бу күн – балаҕан ыйын 3 күнэ – биһиги дойдубут устуоруйатыгар улахан суолталаах. Бу күҥҥэ 1939 сыл балаҕан ыйын 1 күнүгэр саҕаламмыт Аан дойду иккис уоттаах сэриитэ түмүктэммитэ.

Японияны утары сэриигэ Саха сириттэн тыһыынчаттан тахса киһи кыттыбыта. Олортон үгүстэрэ Забайкаллааҕы фронт 39-с аармыйатын 94-с уонна 210-с дивизиятыгар уонна 17-с армыйа 278-1 дивизиятыгар, ону тэҥэ Уһук Илиҥҥи фронт 1 уонна 2 чаастарыгар сулууспалаабыттара. Илиҥҥи кыргыһыы түмүгэр Сэбиэскэй Сойуус аармыйата Хотугулуу-Илиҥҥи Кытайы уонна Хотугу Кореяны босхолообута. ССРС бэйэтин састаабыттан сүтэрбит сирдэрин-уоттарын, чуолаан Соҕуруу Сахалины уонна Курил арыыларын төннөрбүтэ. Ити курдук, үгүс дойдулары хаппыт улахан таһымнаах аан дойду иккис сэриитэ 1945 сыллаахха түмүктэммитэ. Аан дойду иккис сэриитэ түмүктэммит күнэ – аан дойду үгүс норуоттарын иллээх-эйэлээх олохторун туоһута.

Санаттахха, атырдьах ыйын 28 күнүгэр Дьокуускай куорат Кыайыы болуоссатын мэҥэ уотуттан Ньурбаҕа диэри «Кыайыы уота» айаннаабыта. Ньурбаҕа «Кыайыы Уота» Сэбиэскэй Сойуус Дьоруойа, майор Н.Н.Чусовской төрөөбүт нэһилиэгиттэн — Антоновкаттан балаҕан ыйын 3 күнүттэн саҕалаан Ньурба улууһун бары нэһилиэктэрин кэрийиэҕэ. Тэрээһин Кыайыы 80 сылын көрсө «Кыайыы уотун эстафетата» диэн патриотическай аахсыйа чэрчитинэн ыытыллар. Саха сирин бары муниципальнай тэриллиилэригэр ыытыллар эстафетаны көҕүлээччинэн Ил Дархана Айсен Николаев буолар.