Аан дойду култуурата — «Доҕордоһуу» түһүлгэтигэр

Аныгылыы албастаах сахха
Айхалы тардыһан
Алҕаатаҕым буоллун.
Саҥа ыччаппын,
Субу кубулҕаттаах үйэҕэ
Уруйу тосхойон
Туойдаҕым буоллун

Оҕолоох- доҕорбор!

А.Е. Кулаковскай – Өксөкүлээх Өлөксөй.

» ОТТОКУ ОЛУК АЛГЫҺА»

  Алгыстаах Таатта сиригэр сааскы сандаархай ыйдарга култуура уонна ускуустуба ураты тэрээһинэ тэрилиннэ. Биир чаҕылхай түгэнинэн “Доҕордоһуу”  үҥкүү норуодунай ансаамбылын үбүлүөйдээх кэнсиэригэр үҥкүү-битии арааһа көҕүлүттэн тутулунна.

Бу үөрүүлээх тэрээһиҥҥэ ансаамбылы төрүттээбит, бастакы салайааччы, “Саха Сирин киэн туттуута” норуот бириэмийэтин кыайыылааҕа, СӨ култууратын үтүөлээх үлэһитэ,  Таатта, Сунтаар улуустарын, Элгээйи нэһилиэгин бочуоттаах олохтооҕо Августина Федоровна Клакинова ытык мааны ыалдьытынан буолла.

Ансаамбылы билигин салайар СӨ үтүөлээх үлэһитэ, Таатта нэһилиэгин бочуоттаах олохтооҕо Валентин Константинович Козлов далааһыннаах тэрээһини иилээн- саҕалалаан тэрийдэ. Былатыан Ойуунускай аатынан Таатта норуодунай тыйаатырыгар икки түһүмэхтээх, уонна Дьокуускай куоракка Өксөкүлээх Өлөксөй аатынан норуоттар доҕордоһууларын дьиэтигэр үҥкүү өрөгөйдөөх киэһээлэрэ ньиргийдилэр.

«Доҕордоһуу» ансаамбыл биир сөҕүмэр, көлүөнэттэн-көлүөнэҕэ бэриллэр үтүө үгэһинэнэн — ансаамбыл репертуара норуот үҥкүүлэринэн туолан иһиитэ буолар. Ол курдук, 55 сыл тухары элбэх үҥкүү дьоҥҥо-сэргэҕэ таҕыста, биһирэбили ылыан ылла. Ситиигэ тиһиллибит салама кэриэтэ дьэрэкээн ойууну-оһуору санатар норуоттар үҥкүүлэрэ ытыс тыаһынан доҕуһуолланнылар. Ансаамбыл историятын сэгэттэххэ, кэнсиэрбит үҥкүү тылынан кэпсээннээх, сэһэннээх буолла. Ааспыт үйэ 70-с сылларыгар Клакинова А.Ф. “Эҕэрдэ үнкүүтүнэн”  устуоруйа кэрчигин саҕалаабыта. Талааннаах салайааччы Турнин Л.Н. кытта бииргэ үлэлээн, 1979 сыллаахха эбээннии “Гассигор”  хоту дойду хоһуун дьонун хоһуйбуттара. 1976 сыллаахха Элякова С. Х. туруоруутугар ыччат бэстибээлигэр сүрэхтэммит  “Сайын кэлиитэ” үҥкүүтэ  сүрэҕи-быары долгутта. 1989 сыллаахха ансаамбыл выпускницата Васильева А.И. “Узбекскай үҥкүүнү” сценаҕа туруорбута. «Доҕордоһуу» мааны түһүлгэтигэр үҥкүү арааһын үөрэтии, чинчийии уонна репертуарга киллэрии тиһиктээхтик салҕаммыта. Ол курдук, “Хотугу үҥкүү», “Мастерицы” (туруорааччы Рахлеева Нюргустана Титовна), “Муора тойуга” (туруорааччы Маркова Элеонора Васильевна), “Башкирскай үҥкүү” (туруорааччы Сидорова Венера Олеговна),  саҥа көлүөнэ хореографтара “Киргизскэй үҥкүүнү” толоруулара (туруорааччы Данилова Анна Николаевна), “Тувин ыччатын үҥкүүтэ” (туруорааччы Данилова Анна Николаевна), “Татарскай үҥкүү” “Монгольскай үҥкүү» (туруорааччы Козлова Наина Владиславовна) биһирэбили ылбыттара. Бу бачыымы тутуһан эдэр практиканнар  Чойнова А.В. “Бурятскай үҥкүүнү”, Томская Юлия Петровна “Дыхание Севера” туруоруулара ансаамбыл репертуарын байыппыттара.

Кэрэ, чаҕылхай көстүүмнэр, ураты имигэс хамсаныылар, ырыа-тойук бука барыта баай ис хоһооннонно. «Доҕордоһуу» ансаамбыл доҕордоһууну өрө туталлара, дьоҥҥо-сэргэҕэ үтүөнү тарҕаталлара арылыччы көһүннэ.

Марианна Степанова,

улуустааҕы норуот айымньытын дьиэтин дириэктэрин солбуйааччы.

Ытык Күөл, Таатта.

Хаартыскалар Сюзанна Седалищева түһэриилэрэ.