Аан дойдутааҕы дьиэ кэргэн күнүнэн Ил Дархан Айсен Николаев эҕэрдэтэ

Ытыктабыллаах Саха сирин олохтоохторо!

Аан дойдутааҕы дьиэ кэргэн күнүнэн Саха Өрөспүүбүлүкэтин дьаһалтатын уонна тус бэйэм ааппыттан  эһигини эҕэрдэлиибин!

Биһиэхэ барыбытыгар дьиэ кэргэн — саамай күндүбүт. Хас биирдиибит хайдах киһи буола улаатарыгар дьиэ кэргэн иитиитэ улахан оруоллаах. Дьиэ кэргэҥҥэ иитии улахан суолталаах. Төрөөбүт дойдуга, дьиэ кэргэҥҥэ бэриниилээх дьону иитэн таһаарыы биһиги сүрүн сорукпутунан буолар.

Аан дойду тутулугар тахсар уларыйыылар, арҕаа дойдулар сиэрдээх майгыларын-сигилилэрин сүтэрбит кэмнэригэр биһиги судаарыстыбабыт киһи аймах тутуһан кэлбит дьиҥ сөптөөх сиэрин-майгытын, дьиҥнээх дьиэ кэргэн духуобунай сыаннастарын көмүскүүр тирэх сиринэн буолар.

Элбэх оҕолоох дьиэ кэргэн биһиэхэ урут уруккуттан ытыктанар. Биһиги өрөспүүбүлүкэбитигэр 34 тыһыынча элбэх оҕолоох дьиэ кэргэн баар, олорго 118 тыһыынча оҕо иитиллэр. Кинилэргэ куруутун улахан болҕомто ууруллар. Бары гражданнарга анаммыт федеральнай Ийэ хапытаалын таһынан 2011 сылтан саҕалаан өрөспүүбүлүкэтээҕи “Дьиэ кэргэн” диэн ааттанар Ийэ хапытаала үһүс уонна онтон кэлин төрөөбүт оҕолорго бэриллэр.

Саха АССР тэриллибитэ 100 сыллаах үбүлүөйүгэр “Үйэ оҕолоро” диэн 100 тыһыынча солкуобай кээмэйдээх анал хапытаал бэриллэр буолбута. Бу үбү үбүлүөйдээх сыл тохсунньу 1 күнүттэн ахсынньы 31 күнүгэр төрөөбүт оҕолор тутар этилэр. Быйыл “Үйэ оҕолоро” анал хапытаалы төлөөһүнү өссө биэс сылга уһатар туһунан баһаарыыны ыллым. 2023 сыл ыам ыйын 1 күнүгэр бу хапытаалы туттарыы туһунан 13 016 быһаарыы ылылынна.

Биһиги туох-баар кыахпытын дьиэ кэргэн укулаатын сайыннарыыга, оҕо төрөөһүнүн өйөөһүҥҥэ салгыы ууруохпут. Бу сыл бастакы түөрт ыйыгар Саха сиригэр номнуо 3 589 оҕо төрөөтө, олортон — 1 824 уол, 1765 кыыс!

Биллэн турар, бүгүн ураты болҕомтону байыаннайдарга, байыаннай дьайыы кыттыылаахтарын дьиэ кэргэттэрин өйөөһүҥҥэ уурабыт, кинилэргэ күүс-көмө буолабыт.

Саха сиригэр федеральнай социальнай көмө миэрэлэрин таһынан бэйэбит эбии көмөлөһөбүт. Бу биир кэмнээх үбүнэн көмө, уһуйаан төлөбүрүттэн босхолооһун, оскуолаҕа босхо аһылык, устудьуон оҕолорго эбии истипиэндьийэ, Саха сирин бүддьүөтүттэн төлөнөр миэстэлэргэ бастакы уочарат ылыы, байыаннай сулууспаҕа сылдьар дьон оҕолоругар уонна төрөппүттэригэр доруобуйаларын тупсарар санаторийдарга босхо путевкалар, уонна да атын өйөбүл миэрэлэрэ.

Дьиэ кэргэни өйөөһүн үлэтэ өрөспүүбүлүкэбитигэр өссө даҕаны салгыы ыытыллыаҕа.

Күндү биир дойдулаахтарым!

Дьиэ кэргэҥҥитигэр дьолу-соргуну, инникигэ ситиһиилэри баҕарабын. Чугас дьоҥҥут, аймахтаргыт, дьиэ кэргэҥҥит эһиги аттыгытыгар куруутун баар буоллуннар. Барыгытыгар эйэлээх халлааны. Бэйэ бэйэҕитин харыстааҥ!

Саха Өрөспүүбүлүкэтин Ил Дархана А.С. Николаев