Аан дойдутааҕы этноспорт пуорумугар «Манчаары оонньуулара» улахан биһирэбили ылла

Муус устар 18-20 күннэригэр Санкт-Петербург куоракка Аан дойдутааҕы этноспорт Сойууһа тэрийбит VII Этноспортивнай биэдэмистибэннэй пуорума буолан ааста.

Бу улахан тэрээһиҥҥэ аан дойду 39 дойду бэрэстэбиитэллэрэ кытыннылар, ол иһигэр Саха сирин дэлэгээссийэтэ «Манчаары оонньуулара» успуорт национальнай көрүҥнэригэр ХХІ спартакиаданы билиһиннэрдилэр. Оонньуу билиһиннэриитигэр Саха Өрөспүүбүлүкэтин былаһаакката тэриллэн, пуорум биир саамай бэлиэ түгэнинэн буолла.

Дэлэгээссийэни СӨ Бырабыыталыстыбатын бэрэссэдээтэлин солбуйааччы Сергей Местников салайда. Дэлэгээссийэ састаабыгар Физкултуураҕа уонна успуорка миниистирэ Леонид Спиридонов, В. Манчаары өрөспүүбүлүкэтээҕи успуорт национальнай көрүҥнэрин киинин дириэктэрэ Геннадий Васильев, «Сахаада спорт» Ассоциация Бэрэсидьиэнэ Александр Ким-Кимэн, ону тэҥэ РЦНВС үлэһиттэрэ уонна спортсменнар киирдилэр.

Экспозиция чэрчитинэн спартакиада уонна успуорт национальнай көрүҥнэрин видеотун, саха спортсменнара оонньуулар хайдах баралларын, ону тэҥэ XXII «Манчаары оонньууларын» ураты сувенирдарын уонна наҕараадаларын көрдөрдүлэр. Пуорум кыттыылаахтара Саха сирин култуурунай уонна успуорт нэһилиэстибэтин кытта ыкса билсистилэр, кэлэр успуорт тэрээһинин сыаналаатылар.

Саха сирин дэлэгээссийэтэ тас дойдулар бэрэстэбиитэллэрин кытта култуура уонна успуорт сыһыаннаһыытын атастаһыытын кыаҕын, ону тэҥэ Саха сирин успуордун национальнай көрүҥнэрин аан дойдуга креативнай уонна ирдэниллэр ньыма быһыытынан тахсарга кэккэ оробуочай көрсүһүүлэри ыыттылар.

Пуорум түмүгүнэн Билал Эрдоган Владимир Путиҥҥа төрүт үгэс буолбут успуорт көрүҥнэрин сайыннарыыга боччумнаах кылаатын иһин «Этноспорт лидера» ааты аныыр туһунан иһитиннэрдэ, диэн В. Манчаары успуорт киинин пресс-сулууспата суруйар.

Наҕарааданы успуорт миниистирэ Михаил Дегтяревка үөрүүлээхтик туттардылар. Пуорум норуоттар икки ардыларынааҕы кэпсэтиини бөҕөргөтүүгэ, төрүт үгэс буолбут успуорт көрүҥнэрин тарҕатыыга норуоттар икки ардыларынааҕы былаһаакканан буолла. ХХІ «Манчаары оонньууларын» билиһиннэриитэ Саха сирин этноспорды сайыннарыы хамсааһыныгар биир лидер быһыытынан бэлиэтэннэ.