Хаартыска: Тель-Авив. Dzen.ru саайт
Бэс ыйын 13 күнүгэр, бээтинсэ сарсыарда, Израиль оборуонатын аармыйата уонна эрэспиэскэтин сулууспата Моссад Ираны ракетанан ытыалаатылар уонна дойдуларыгар ыксаллаах быһыыны-майгыны биллэрдилэр.
Fars ааҕыныстыба иһитиннэрбитинэн, бу атаака түмүгэр Ираҥҥа 78 киһи өлбүт, 329 киһи эмсэҕэлээбит. Иран киин куоратыгар Тегераҥҥа кырата алта эстии буолбут, ол иһигэр үрдүк сололоох хамандыырдар олорор кыбартаалларыгар уонна байыаннай базаларыгар. Ол түмүгэр КСИР хамандыыра генерал-майор Хоссейн Салами, Иран Сэбилэниилээх Күүстэрин Генеральнай штабын начаалынньыга, генерал-майор Мохаммад Багери, хамандыыры солбуйааччы Голамали Рашид, АХШ-ы кытта ядернай кэпсэтиилэри ыытар улахан сабыдыаллаах бэлиитик Али Шамхани, ону кытта атомщик-учуонайдар Мохаммад Мехди Техранчи уонна Ферейдун Аббаси, о.д.а. өлбүттэр. ХНТ үлэлиир Иран бастайааннай бэрэстэбиитэлэ Израиль бу саба түһүүнэн сэриини биллэрдэ диэтэ.
Израиль атаакатын сыала-соруга – ураны байытыынан дьарыктанар Иран тэрилтэлэрин төрдүттэн эһии буолар. Тегеран ядернай сэрии сэбин оҥорорго төһөҕө-хаччаҕа тиийбитин ким да чуолкай билбэт, ол эрээри Reuters суруйарынан, аҕыйах күн иһигэр 15 ядернай буомбаны оҥоро охсон, туттар кыахтаах.
Израиль былаастара эпэрээссийэ “төһө наада буоларынан соччо күн барыа” диэн этэн туран, резервэҕэ олорор тыһыынчанан дьону ыҥыран ыллылар.
Эппиэт уһаабата, бээтинсэ киэһэ Иран Израильга икки төгүллээн 200-чэкэ баллистическай аракыатаны ыытта. Иран IRNA ааҕыныстыбата эппитинэн, аан бастакытын бойобуой дьайыылар кэмнэригэр уу аннынааҕы луодкаттан баллистическай аракыаталар ыытыллыбыттар. AXIOS бигэргэтэринэн, АХШ Ирантан иһэр аракатыалары ытыалааһыҥҥа Израильга көмөлөспүт.
СМИ дааннайынан, Иран ракеталара Израиль Оборуонатын министиэристибэтин штаб-кыбартыыратыгар иккитэ кэлэн түспүттэр. КСИР бигэргэтэринэн, Израиль аракатыалары оҥорор киинин, байыаннай бырамыысыланнаһын эбийиэктэрин таппыттар. Ол эрээри Израиль өттүттэн улахан хоромньу тахсыбатаҕын этэллэр.
Иирсээн буолаатын кытта Владимир Путин Иран бэрэсидьиэнэ Масуд Пезешкианныын уонна Израиль премьер-миниистирэ Биньямин Нетаньяхуну кытта кэпсэттэ. Арассыыйа бэрэсидьиэнэ Иран салалтатыгар уонна норуотугар кутурҕанын биллэрдэ. ХНТ Устаабын уонна норуоттар икки ардыларынааҕы быраабы кэспитинэн Израиль дьайыытын сэмэлээтэ. Израиль премьер-миниистирин кытта кэпсэтиигэ РФ бэрэсидьиэнэ Иран ядернай бырагырааматын таарыйар боппуруостары бэлитиичэскэй-дипломатическай кэпсэтиилэринэн быһаарар наадалаҕын эттэ, иирсээн салгыы дириҥээбэтин туһугар тупсуһуннарар өрүт буоларга бэлэмин биллэрдэ, диэн иһитиннэрэр Кремлин.ру.
Тохсунньу 11 күнүгэр Арчы дьиэтигэр "Оһуокай" түмсүү тэрийиитинэн, Чурапчы улууһугар аналлаах оһуокай үрдүк таһымнаахтык ааста.…
Саҥа дьыл барахсан, оннук-маннык итэҕэллэргэ, кирдээх бэлиитикэҕэ умньамматах, соҕотох алыптаах, оҕотуттан оҕонньоругар тиийэ дуоһуйа, астына…
Саха сирэ хорсун-хоодуот дьонунан аатырар, дойду устуоруйатыгар элбэх дьоруойу бэлэхтээбитэ, олор истэригэр Аҕа дойду Улуу…
Ааспыт сууккаҕа Саха сиригэр буруйу оҥоруу сэттэ түбэлтэтэ тахсыбыт. Манан процессуальнай бэрэбиэркэни ыытыыны уонна холуобунай…
«Якутскэнерго» ПАУо өрөспүүбүлүкэ олоҕо-дьаһаҕа бигэ туруктаах буолуутугар уотунан-сылааһынан хааччыйар дьоһун суолталаах тэрилтэнэн буолар. Хампаанньа генеральнай…
Бүгүн, тохсунньу 11 күнүгэр, өрөспүүбүлүкэ соҕуруулуу-арҕаа, хотугулуу-илин, илин өттүгэр кыралаан хаардыаҕа. Киин, арҕаа оройуоннарга туманнаах…