«Аар Кудай» кэрэ куолара оҕо саас бырааһынньыгын бэлэхтээтилэр

«Аар Кудай» кэрэ көстүү уонна духуобунас күрэхтэһиитэ бүгүн төрдүс күнүн ыытылынна. 

«Аар Кудай» куонкурус пресс-сэкирэтээрэ Уйгулаана Портнягина тэрээһин бүгүҥҥү бэлиэ түһүмэхтэрин туһунан маннык кэпсээтэ:

— Бүгүҥҥү күн эти-хааны эрчийэр сэргэх фитнес-сэрээккэттэн  саҕаланна. Фитнеһи Саха сиринээҕи фитнес бэдэрээссийэтин бэрэсэдьиэнэ Лилия Дмитриева иилээн-саҕалаан ыытта. Салгыы Аполлинария Дегтярёва тус бренди хайдах сайыннарар туһунан сиһилии кэпсээтэ, саҥа дьону кытта  толлубакка билсэргэ үөрэттэ. Ол кэнниттэн кэрэ көстүү солуон кыргыттара: визажист — Дайаана Баланова, баттах стилиһэ Саргылаана Васильева кэрэ буолуу кистэлэҥнэрин арыйдылар. Бүгүҥҥүттэн кыргыттар Сардана Порядина салайыытынан сыанаҕа хаамар дьарыгы саҕалаатылар. Кыттааччылар үгүстэрэ «аан бастакыбытын үрдүк хобулук кэтэн хаамтыбыт» диэн билиннилэр. 

Бу күн умнуллубат түгэнинэн «Аар Кудай» куонкурус кыттааччылара оҕо ииттэ ылбыт  дьиэ кэргэттэри кытта көрүстүлэр уонна  кинилэр оҕолоругар анаан аһымал аахсыйаны тэрийдилэр.

Хас да бөлөххө арахсан оҕолору оонньоттулар, маастар-кылаастары ыыттылар, ас астатан, уруһуйдатан, чугастык алтыһан, оҕолор үөрүүлэрэ үс бүк үрдээтэ. Хас биирдии хамаанда оҕолорго минньигэс бэлэхтэри, оонньуурдары туттардылар. Оҕолор үөрбүт, махтана чаҕылыспыт харахтарыттан кыттааччылар уйадыйан ыллылар.  

«Аар Кудай» кэрэ көстүү уонна духуобунас куонкуруһун биир сүрүн  номинацията — «Аар Далбар» хайысха. Бу манна туһуланан улахан дьиэ кэргэн күн-күбэй ийэтэ, тулаайах хаалбыт оҕолору иитэр Жанна Нуриманова кытта сылдьар.
— Бу куонкурус сиэри-майгыны өрө тутарын иһин кыттарга санаммытым. Биһиги дьиэ кэргэҥҥэ 15 оҕолоохпут, онтон үһэ —  бэйэбит төрөппүт оҕобут. Оҕолорбут улаатан истэхтэрин аайы оҕо иитэ ылар соруктаммыппыт. Хомойуох иһин, ол кэмнэргэ ыкса алтыспыт доҕотторбут олохтон тэҥҥэ  соһуччу туораабыттара. Онно 4 оҕо тулаайах хаалбыта. Кэргэммин кытта сүбэлэһэн, доҕотторбут оҕолоро да буоллахтара, бэйэбитигэр ылбыппыт. Ол кэнниттэн «табыллар эбит» диэн санааҕа кэлбиппит.  Бэйэм  идэбинэн педагогпун. Төрөппүт оскуолатыгар элбэхтик үөрэнэн, араас үөрэҕи ааһан, өссө оҕо ыларга санаммыппыт. Оҕолорбут наһаа үчүгэйдэр, истигэннэр, үөрэҕи холкутук ылыналлар. Оҕолорбутун сахалыы итэҕэлгэ айылҕаны харыстыырга, сиргэ-уокка сылдьарга, үлэни таптыырга, дьоҥҥо-сэргэҕэ көрсүө-сэмэй буоларга иитэбит-үөрэтэбит. Түөрт улахан оҕобут номнуо улаатан үөрэхтэрин бүтэрэн,  Дьокуускайынан, Санкт-Петербурунан, Москванан, Уфанан олороллор. 11 оҕобутуттан улахаттар оскуолаҕа үөрэнэллэр, 2 кырачаан — уһуйааҥҥа сылдьаллар. Бу куонкуруска ис санаабын тургутан көрөөрү, дьахтар, ийэ быһыытынан бэйэбин көрдөрөр, атыттартан үөрэнэр соруктаах кыттабын. Төһө да элбэх оҕолоох буол, күннээҕи кыһалҕаҥ, дьиэ-уот бүппэт үлэтэ да буоллун, дьахтар куруутун дьахтар буолуохтаах. Үтүө санаатын, аламаҕай сыһыанын, истиҥ майгытын сүтэриэ суохтаах, —— диэн санаатын үллэһиннэ олоххо көхтөөх Жанна Нуриманова.

 Тэрээһин бары кыттааччылара итинник хорсун санаалаах, нарын дууһалаах саха дьахталлара. Ол туоһутунан буолуоҕа кулун тутар 16 күнүгэр ыытыллар «Аар Кудай» кэрэ көстүү уонна духуобунас куонкуруһа!