«Аар Кудай» — саха дьахтарын кэрэ көстүүтун, ис туругун туоһута

Бу күннэргэ Аан дойдутааҕы Дьахтар күнүн чэрчитинэн саха дьахтарыгар анаммыт «Аар Кудай» куонкуруска бэлэмнэнии буола турар.  

Өрөспүүбүлүкэҕэ аан бастакытын ыытыллар сонун тэрээһиҥҥэ араас улуустартан  45 араас идэлээх дьахтар кэлэн, суолталаах тэрээһиҥҥэ кыттаары сылдьар.

«Аар Кудай» куонкурус туһунан бырайыак ааптара, «Аар Кудай» духуобунас пуонадатын төрүттээччи, Индияҕа ыытыллыбыт «MRS.UNITY WORLD», Россияҕа «MRS RUSSIAN WORLD» кэрэ куолар күрэстэрин муҥутуур кыайыылааҕа Зарьяна Юмшанова тэрээһин туһунан бу курдук билиһиннэрдэ:

— Бырайыак 2024 сыл муус устар 13 күнүгэр толкуйдаммыта. Бастаан аатыгар өйбүтүн сыспыппыт. “Мисс, Миссис…” уо.д.а. стандартарынан ааттыы сатаабыппыт да, сахалыы тыына суох курдуга. Онтон “Аар Кудай” аат куйаарынан кэлбитэ. Аар —куйаар, Кудай – уус. «Аар Кудай» тэрээһин — сааһыттан тутулуга суох саха дьахтарын кэрэ көстүүтун уонна сиэрдээх майгытын туоһута. Хас биирдии дьахтар бэйэтэ туспа уратылаах, киэҥ куйаардыын ситимнээх. Онон саха Кэрэ Куотугар «Аар Кудай» конкурус  аан дойду дьахталларын кытта алтыһыытыгар ааны тэлэччи аһар далаһанан буолар.

Тэрээһин туһунан улуустарга ыыппыппытыгар 300-тэн тахса сайаапка киирбитэ. Онтон 45 кыттааччыны таллыбыт. Маныаха идэтийбит фотограф Дмитрий Ляшеев видеолара, хаартыскалара көмөлөстө.

Тэрээһин кыттааччылара Уус Алдан, Мэҥэ Хаҥалас, Чурапчы, Амма, Томпо, Ньурба, Бүлүү, Ленскэй, Эбээн Бытантай, Дьааҥы, Алдан, Уус Майа улуустарыттан кэллилэр. Ону тэҥэ, Кыргызстан, Бурятия Өрөспүүбүлүкэлэриттэн, Соҕуруу Африка Намибия, Ботсвана дойдуларын бирэстэбиитэллэрэ эмиэ бааллар. Күрэс түмүгүнэн саастарынан арахсан: «Аар Куо” (17-30 саастаахтар), «Аар Хотун» (31-41 саастаахтар), «Аар Далбар» (42 саастан үөһээ саастаахтар) анал ааттары ылыахтара. Муҥутуур кыайыылаах «Аар Кудай» бочуоттаах аакка тиксиэҕэ.

Бастакы күн – кулун тутар 8 күнүгэр “Арчы дьиэтигэр” куонкурс кыттыылаахтарыгар СӨ үтүөлээх артыыһа, РФ култууратын үтүөлээх үлэһитэ Афанасий Фёдоров алгыс баһын анаата. Биллиилээх спортсменнар: мас тардыһыыга аан дойду уонна Европа чөмпүйүөнэ, РФ успордун маастара Василий Захаров, чэпчэки атлетикаҕа РФ үс төгүллээх чөмпүйүөнэ Саргылаан Семёнов уонна уо.д.а. сибэкки дьөрбөтүн бэлэхтээтилэр. Кыттааччылар үөрүүлээх быһыыга-майгыга хаһыс нүөмэринэн кытталларын долгуйа таллылар.

Бу нүөмэрдэринэн кинилэр кулун тутар 16 күнүгэр Суорун Омоллоон аатынан Опера уонна Балет судаарыстыбаннай тыйаатырыгар түмүк тэрээһиҥҥэ тахсыахтара.

Күрэскэ бэлэмнэнии бастакы күнэ Хаҥалас улууһугар буолла. Кыттааччылар сыанаҕа, дьон ортотугар хайдах туттан-хаптан, бэйэлэрин аҕыйах бириэмэ иһигэр чаҕылхайдык билиһиннэрэлллэрин туһугар продюсер, бренд менеджер, режиссёр Аполлинария Дегтярёва араатар ускуустубатыгар маастар кылааһы ыытта. Уопуттаах спикер араас кистэлэҥи арыйда, тургутар оонньуулары оонньотто. Салгыы мин «Кэрэ эйгэ уонна уйгулаах олох» кууруһун тэрийдим. Бу дьахтар-аймах бэйэ-бэйэтин кытта алтыһарга, тууйуллубут санааларын босхолууругар дьикти күүстээх көрүҥ.

Дьүүллүүр сүбэ Опера уонна балет судаарыстыбаннай тыйаатырын дириэктэрэ Владислав Левочкин, бастыҥ визажист уонна стилист Василий Афанасьев, опера ырыаһыта Айталина Адамова, “Аврора”, “Махтал”, “Трапеза” эрэстэрээннэри салайар Ньургустаана Лукина уонна бырайыак ааптара быһыытынан мин.

Муҥутуур кыайыылаах Индияҕа ыытыллар Норуоттар икки ардыларынааҕы  «MRS.UNITY 2025» кэрэ куолар күрэстэригэр путёвканы уонна харчынан 1 мөлүйүөн солкуобай бирииһинэн наҕаарадаланыаҕа.  «Аар Кудай» кэрэ куоларын аҕыс күн устата реалити-шоу көрүҥүнэн араас көрсүһүүлэр, маастар-кылаастар, духуобунас практикалара, cайдыы, бэйэ-бэйэни кытта билсии, кэрэ эйгэлиин алтыһыы кэтэһэр.