“Аар Кудай” үтүө өйдөбүлү хаалларда

Быйыл ыытылла турар култуурунай тэрээһиннэртэн кулун тутарга буолан ааспыт «Аар Кудай» норуоттар икки ардыларынааҕы кэрэ буолуу уонна духуобунас куонкуруһа үгүс дьоҥҥо биир үтүө өйдөбүлү хаалларда.

Тэрээһиҥҥэ өрөспүүбүлүкэ 13 улууһуттан 46 кэрэ дьахтар кыттыыны ылбыта. Маны таһынан, Киргизияттан, Бурятияттан, Намибия уонна Ботсвана курдук Африка дойдуларыттан кытта кэлэн кыттыбыттара.

Бүгүн “Сахамедиа”  медиа-киинигэр «Аар Кудай»  куонкуруһу тэрийээччилэр суруналыыстары кытта көрсөн, бу улахан бырайыак хайдах толкуйдаммытын, кимнээх хайдах кыттыбыттарын сырдаттылар.

-Киһи кыраныысса таһыгар ыытыллар улахан тэрээһиннэргэ кыттан ситиһиилэннэҕинэ, өйө-санаата үйэлээххэ тардыһар, билиитэ-көрүүтэ кэҥиир эбит. Ол иһин мин бу кэрэ дьахталларга туһуламмыт куонкуруһу төрөөбүт Сахам сиригэр тэрийэр бырайыагы анаан толкуйдаан, тоҕус ый устата иитиэхтээн бэлэмнэммитим. Ол да иһин буолуо, “Аар Кудай” куонкуруһу бэйэм төрөппүт оҕом курдук ылынабын, — диэн бэлиэтээтэ   бырайыак салайааччыта, «Аар Кудай» духуобунай сайдыы пуондатын бэрэсидьиэнэ Зарьяна Юмшанова.

“Аар Кудай” куонкурус кыайыылааҕынан 41 саастаах Уус Алдан улууһун төрүт олохтооҕо, математика учуутала, элбэх оҕолоох ийэ  Сардаана Гуляева буолбута. Кини «Аар Кудай» бочуоттаах аатынан, 1 000 000 солкуобайынан наҕараадаламмыта. Аны күһүн “Единство Мира-2025” диэн  норуоттар икки ардыларынааҕы кэрэ дьахталлар куонкурустарыгар Саха сирин чиэһин Индияҕа тиийэн көмүскүөхтээх.

— “Аар Кудай” куонкурус миэхэ бэрт элбэҕи биэрдэ. Сиэргэ-туомҥа, киһи киһиэхэ сыһыаныгар, үтүөнү оҥорууга бэрт элбэххэ үөрэнним. Олус талааннаах, кыахтаах, бэйэлэригэр эрэллээх үөлээннээхтэрбин кытта билсэн, олоҕу саҥалыы уратытык көрдүм, — диэн эттэ Сардаана Гуляева пресс-кэмпириэнсийэҕэ.

Дьааҥыттан сылдьар 50 саастаах Саяра Лаврова бэйэтин “биэс оҕолоохпун, икки сиэннээхпин, 44 саастаахпар эбээ буолбутум” диэн билиһиннэрдэ. Салгыы куонкурус кыттааччыта уһун атахтаах кэрэ куолары кытта хааман көрөн баран, киэһэ 11 чааска  дьиэтигэр кэлэн, кэргэнин иннигэр олорон маккыраччы ытаабытын кэпсээтэ.

— Кэргэммэр «аны хаһан да маннык ис хоһоонноох куонкурустарга кыттыбаппын” диэн мэктиэ тылбын эппитим. Икки хонон баран, тэрийээччи Зарьяна Юмшанова «бүгүн “Мисс Сэрбэкэ” куонкуруһугар кытта кэл” диэбитигэр, ыксалынан хомунан бардым. Тахсарбар кэргэним бэркиһээн, “саҥарбыт саҥаҥ сүтэ илигинэ, кыттар буолан хааллыҥ дуо?” дии хаалбыта.  Миэхэ бу куонкурус бэрт элбэҕи биэрдэ. Кылаабынайа, бэйэм кыахпар эрэнним, — диэн бэлиэтээтэ Саяра Лаврова.

Бүлүүттэн төрүттээх, Таатта Баайаҕатыттан тардыылаах Вера Софронеева  оҕо сааһа Аммаҕа ааспыт буолан, кута-сүрэ бу кэрэ дойдуга баарыттан, Кыыс Амма бэрэстэбиитэлин быһыытынан кыттыбыт. “Бу куонкуруска дьахтар кэрэ сэбэрэтэ эрэ буолбакка, духуобунай ис кута эмиэ арыллыахтаах” диэбиттэриттэн алгысчыт буолан, миэхэ чугас эбит диэн кыттыбытым. Бэрт элбэххэ үөрэнним, билиим-көрүүм үрдээтэ”, — диэн  санаатын үллэһиннэ Вера Софронеева.

… Ити курдук, “Аар Кудай” кэрэ көстүү уонна духуобунас куонкуруһа бэрт үгүс үтүөҕэ, кэрэҕэ, сырдыкка тардыһар кыргыттары түмэн, биир ситимнээтэ.