Аармыйаҕа сулууспалыыр аҕа оҕолоругар босуобуйа төлөнөр

Социальнай пуонда Саха сиринээҕи салаата аармыйаҕа ыҥырыллыбыт байыаннай сулууспалаах оҕотугар ыйдааҕы босуобуйаны төлүүр.

Бу босуобуйа аармыйаҕа ыҥырыллан барбыт, мобилизациянан ыҥырыллыбыт, эбэтэр, байыаннай үөрэх тэрилтэтигэр 1-кы кууруска үөрэнэ сылдьар устудьуон аҕа оҕолоругар ананар.

Төлөбүр оҕо төрүөҕүттэн, ол эрээри, аҕата байыаннай сулууспатын саҕалаабыт күнүттэн, оҕо 3 сааһын туолуор диэри төлөнөр. Аҕата сулууспалаан бүттэҕинэ, төлөбүр тохтуур. Дьиэ кэргэҥҥэ хас да оҕо баар буоллаҕына, хас биирдиилэригэр төлөнөр.

Босуобуйа кээмэйэ — оройуон коэффициентыттан тутулуктанан, 25 599 солкуобайтан 36 570 солкуобайга диэри. 

Саха сиригэр аармыйаҕа ыҥырыллыбыт байыаннай сулууспалаах оҕотугар бэриллэр босуобуйаны 59 дьиэ кэргэн ылар. Босуобуйаны аныырга дьиэ кэргэн материальнай балаһыанньата учуоттаммат.