Аармыйаҕа ыҥырыы сылы эргиччи барарын туһунан сокуон барыла ылылынна

Судаарыстыбаннай Дуума дьокутааттара аармыйаҕа ыҥырыы сылы эргиччи барарын көрөр сокуон барылын иккис ааҕыыга ылыммыттар. Бу туһунан ТАСС суруйар. 

Уларыйыыга, мэдиссиинэ көрүүтэ, профессиональнай психологическай талыы уонна призывной хамыыһыйа мунньахтара сылы эргиччи баралларын туһунан көрүллэр. Докумуоҥҥа ыйылларынан, сулууспалааччылары аармыйаҕа сылга иккитэ ыытыахтара – муус устар 1 күнүттэн от ыйын 15 күнүгэр диэри уонна алтынньы 1 күнүттэн ахсынньы 31 күнүгэр диэри.

Уларытыылары көҕүлээбит ааптардар, итини тэҥэ, туспа категориянан аармыйаҕа ыытыы ураты болдьоҕун быһаарарга этии киллэрэллэр. Ол курдук, ыһыыга үлэлиир тыа сирин олохтоохторун аармыйаҕа алтынньы 15 күнүттэн ахсынньы 31 күнүгэр диэри ыытарга этэллэр, педагогическай үлэһиттэри – ыам ыйын 1 күнүттэн от ыйын 15 күнүгэр диэри, онтон Уһук Хоту сир олохтоохторун – ыам ыйын 1 күнүттэн от ыйын 15 күнүгэр диэри эбэтэр сэтинньи 1 күнүттэн ахсынньы 31 күнүгэр диэри.

Сокуон барылын быһаарыы суругар ыйылларынан, саҥа киллэриилэр призывной пууннар ноҕоруускалара үллэриллэрин уонна байыаннай сулууспаҕа ылыы хаачыстыбата тупсарыгар көмөлөһүөхтэрэ.

Сокуоҥҥа РФ Бэрэсидьиэнэ илии баттыыр түгэнигэр, аармыйаҕа сылы эргиччи ылыыга уларыйыылар 2026 сыл тохсунньу 1 күнүттэн олоххо киириэхтэрэ. Бу туһунан ТАСС суруйар.