Хаартыска: Дьолуолаах тиксэриитэ
Кулун тутар 16 күнүгэр суруйааччы Дмитрий Николаевич Пономарев-Дьолуолаах салайааччылаах «Ньурба уоттара» литературнай түмсүү Маалыкай нэһилиэгэр «Аартык» литературнай түмсүү 10 сыллаах үбүлүөйдээх тэрээһинигэр ыалдьыттаата.
2013 сылтан тэриллибит «Аартык» литературнай түмсүү номнуо Маалыкай 20-тэн тахса айар куттааҕын түмэ тардан, нэһилиэк олоҕун сэргэхситэр, «Ньурба уоттара» оройуоннааҕы түмсүү биир күүстээх салаатынан буолар.
Тиэхиньиичэскэй билим доктора, бэрэпиэссэр Д.Е. Афанасьев аатын сүгэр саха балаҕаныгар Маалыкай талааннаах дьоно-сэргэтэ чороонноох быырпаҕынан күндүлээн, тойугунан көрсөн, аал-уоту аһатан үөрүүлээх тэрээһин саҕаланна. Түмсүү салайааччыта, олохтоох бибилэтиэкэр Вера Петровна Аммосова уонна балаҕан хаһаайката, «Иэйиэхсит» аҕам саастаахтар салайааччылара Елизавета Петровна Егорова эҕэрдэ тылларын кэнниттэн, ыалдьыттар С.В. Васильев аатынан кыраайы үөрэтэр түмэлгэ тахсан, Маалыкай биллэр-көстөр дьонун, нэһилиэк устуоруйатын билистилэр. Сэргэх экскурсия кэнниттэн ыалдьыттары саха балаҕанын мааны остуолугар ыҥыран, төрүт аһынан, итии чэйинэн күндүлээтилэр. Икки өттүттэн түмсүү чилиэннэрэ бэйэ-бэйэлэрин кытары билсэн, айар үлэ туһунан кэпсэттиллэр.
Үөрүүлээх тэрээһин 14.00 чаастан «Айар киин» Норуот айымньытын дьиэтигэр аһылынна. «Аартык» литературнай түмсүү чилиэннэрин үбүлүөйдээх сылынан олохтоох дьаһалта, бииргэ үлэлиир дьонноро-сэргэлэрэ, «Ньурба уоттара» литературнай түмсүү истиҥник эҕэрдэлээтилэр. Маны таһынан, «Ньурба уоттара» түмсүү Ньурба оройуонун култуураҕа департаменын Добун суруктарын Маалыкай айар куттаахтарыгар туттарда. «Аартык» түмсүү салайааччыта Вера Петровна үбүлүөйдээх туорду быста, сиэдэрэй астаах-үөллээх остуолга ыалдьыттары ыҥырдылар. Ырыа-тойук, үҥкүү-битии, поэзия аптаах алыбыгар уйдаран, тэрээһин үрдүк таһымнаахтык ааста.
Аартык» литературнай түмсүү уран тыллаахтара инникитин элбии турдуннар, айар аартыктара дьоҥҥо-сэргэҕэ холобур буоллуннар!
Александра ИННОКЕНТЬЕВА, «Ньурба уоттара» түмсүү чилиэнэ, К.Д.Уткин аат. Норуоттар доҕордоһуулара түмэл үлэһитэ
Алдаҥҥа кыбартыыраҕа баһаарга 51 саастаах дьахтар суорума суолланна, 62 саастаах эр киһи эмсэҕэлээтэ диэн СӨ…
Суруналыыстары кытта көрсүһүүтүгэр Евгений Григорьев мээр дуоһунаһыгар салгыы үлэлиир былааннааҕын туһунан иһитиннэрдэ. Ол эбэтэр быыбарга…
Аҕыйах сылтан бэттэх саҥа дьыллааҕы баата оонньуурдары оҥорор киһи элбээтэ. Баататтан оҥоһуллубут Моруос оҕонньоттору, Хаарчааналары…
Бүгүн, ахсынньы 18 күнүгэр, Дьокуускай куорат оскуолаларын үөрэнээччилэригэр актированнай күн биллэрилиннэ. Бу туһунан Дьокуускай куорат…
ОСАГО (автогражданскай эппиэтинэс булгуччулаах страхованиета) тарыыптарыгар уларытыылары киллэрбиттэрэ. Саҥа полиһы хайдах оҥотторор, туох докумуоннар ирдэнэллэрин…
Бүгүн, ахсынньы 18 күнүгэр, Саха сирин сорох улуустарыгар -20 кыраадыс буолара күүтүллэр диэн УГМС иһитиннэрэр.…