Ааспыт өрөбүллэргэ дистанционнай түөкүттэр үс киһи харчытын уорбуттар

Дистанционнай түөкүттэр Саха сирин олохтоохторун албыннаан харчыларын уорбут түбэлтэлэрэ тахсаллара салҕанар. Ааспыт өрөбүл күннэргэ Дьокуускай үс олохтооҕо түөкүттэргэ мөлүйүөн солкуобай кэриҥэ харчыны ыыппыттар.

Ол курдук, 20 саастаах устудьуон кыыска балта эрийэн криптовалютанан үлүннэрбит харчытын уһулан ыларга көмөлөһөрүгэр көрдөспүт. Кыргыттар видеосибээһинэн «үп-харчы хампаанньатын үлэһитин» кытары сибээскэ тахсыбыттар. Кини инструкциятынан устудьуон кыыс бэйэтин аатыгар 104 тыһ. солк. тахса суумалаах кирэдьиит ылбыт уонна эдьиийин счетугар ыыппыт. Салгыы эдьиийэ харчыны түөкүттэргэ ыыппыт. Түөкүн харчы сотору кэминэн төттөрү киириэҕэ диэбит уонна кэлин сибээскэ тахсыбат буолбут. Ол түбэлтэ кэннэ кыыс ийэтин кэпсээбит, ону ийэтэ кинини аферистар албыннаабыттарын быһаарбыт.

Атын түбэлтэҕэ 47 саастаах эр киһи кэргэнин кытта Кытайга уоппускаҕа айанныылларын былааннаабыттар, онон солкуобайы юаҥҥа чэпчэкитик атастаһарга араас ньыманы көрдөөбүттэр. Кэргэнэ «Telegram» нөҥүө харчыны атастаһыннарар биллибэт киһини булбут. Түөкүн харчыны барытын ыйбыт счетугар ыытарга эппит. Эр киһи счетуттан 150 тыһыынча солкуобайы ыыппыт да, юань харчытын төттөрү ылбатах.

Ити таһынан 38 саастаах урбаанньыт дьахтары түөкүттэр быраабы араҥаччылыыр уорганнар үлэһиттэрэ буолан кубулунан албыннаабыттар. Дьахтар кирэдьиит нөҥүө 670 тыһ. солк. ылбыт харчытын уорбуттар. Бу туһунан ИДьМ пресс-сулууспата суруйар.