Ааспыт өрөбүллэргэ Дьокуускай куоракка суол быһылааныгар 9 киһи эчэйбит

Ааспыт өрөбүллэргэ Дьокуускай куоракка 16 суол быһылаана тахсыбыта бэлиэтэннэ. Онтон үһүгэр 9 киһи, ол иһигэр 3 сокуоннай саастарын ситэ илик оҕо эчэйдилэр. Бу туһунан Дьокуускай куорат Госавтоинспекциятын пресс-сулууспата иһитиннэрэр.

Атырдьах ыйын 2 күнүгэр Жатай бөһүөлэгин Трактовай уулуссаҕа 20-с №-дээх дьиэтин аттыгар массыына түҥнэстибит. Барыллаан быһаарыынан, сарсыарда 7 чаас саҕана 71 саастаах «Toyota Vitz» массыына суоппара утары балаһаҕа тахсан биэрэн,  утары иһэр «Toyota Premio» массыынаҕа мэһэйи үөскэппит. Массыына суоппара харсыһыыттан куоттан, суолтан туораабыт. Кэлбит суһал мэдиссиинэ көмөтүн биригээдэтэ 37 саастаах «Toyota Premio» суоппарын балыыһаҕа тиэрдибит. Эр киһи уҥуох тостуулааҕын быһаарбыттар.

Атырдьах ыйын 3 күнүгэр Госавтоинспекция дьуһуурунай бөлөҕөр Капитоновка сэлиэнньэтин аттыгар массыынаны кытта матасыыкыо харсыспытын туһунан иһитиннэрии киирбит. Барыллаан быһаарыллыбытынан, 37 саастаах «Teken-250» матасыыкыл суоппара Тулагы сэлиэнньэтин диэки айаннаан иһэн, утары айанныыр балаһаҕа тахсан биэрэн «Nissan Pino» массыынаны кытта харсыспыт. Суол саахалын түмүгэр, матасыыкыл суоппара эчэйбит, балыыһаҕа киирбит.

Ол күн киэһэ 17 чаас саҕана Бүлүүлүүр тракт 36-с км «Toyota Ipsum» уонна «Toyota Premio» массыыналар кыттыылаах саахал тахсыбыт. Ол түмүгэр 7 киһи, ол иһигэр 3 оҕо эчэйбит, биир киһи өлбүт.