Ааспыт өрөбүллэргэ киин куоракка 11 суол быһылаана тахсыбыт, 3 киһи эчэйбит

Дьокуускай куоракка ааспыт өрөбүллэргэ 11 суол быһылаана тахсыбыта бэлиэтэннэ, 3 киһи эчэйбит.

Субуотаҕа киэһэ 7 чаас саҕана ГАИ дьуһуурунай чааһыгар оҕону түҥнэри көппүттэрин туһунан иһитиннэрии киирбит. Покрышкина уулуссаҕа 102 №-дээх дьиэ аттыгар Пилотов уулусса диэкиттэн иһэр «Лада» массыына 69 саастаах суоппара көҥүллэммэт сиргэ суолу туораан, сүүрэн иһэр 6 саастаах оҕону түҥнэри көппүт. Быһылаан түмүгэр оҕо сототун улахан уҥуоҕа тостубут. Бу туһунан ГАИ пресс-сулууспата иһитиннэрэр.

Балаҕан ыйын 6 күнүгэр Ленин проспегын 35-с №-дээх дьиэтин таһыгар маршрутнай оптуобуһунан айаннаан испит 74 саастаах пассажир сууллан түһэн эчэйбит.

Балаҕан ыйын 7 күнүгэр, киэһэ 20 чаас саҕана Марха түөлбэтигэр «Toyota Land Cruiser» 41 саастаах суоппара Олег Кошевой уулуссатыттан хаҥас диэки туораары «Regulmoto Five» питбайктаах 27 саастаах киһиэхэ суолу биэрбэккэ, харсыһыыны оҥорбут. Быһылаан түмүгэр питбайктаах киһи эт-хаан улахан эчэйиитин ылбыт.

Суолга куттал суох буолуутун судаарыстыбаннай иниспиэксийэтэ быраабылалары кытаанахтык тутуһуу эрэ олоххутун харыстыыр кыахтааҕын санатар. Суолга сэрэхтээх буолуҥ!