Ааспыт нэдиэлэҕэ өрөспүүбүлүкэҕэ 10 659 киһи ыалдьыбыт

Роспотребнадзор иһитиннэрэринэн, ааспыт нэдиэлэҕэ өрөспүүбүлүкэ үрдүнэн 10 659 киһи ыалдьыбыта бэлиэтэммит. Үһүс нэдиэлэтин ОРВИнан уонна гириибинэн ыалдьааччы ахсаана эбиллэ турар. Ити онно ааспыт нэдиэлэни кытта тэҥнээтэххэ 24,5% үрдүк.

Дьокуускай куоракка 8604 киһи (80,7%) ыалдьыбыта бэлиэтэммит, ол иннинээҕи нэдиэлэҕэ тэҥнээтэххэ 41,4% элбээбит.

Лабаратыарыйа бигэргэтиитинэн, кэлиҥҥи үс нэдиэлэҕэ А (H3N2) гириип вируһа киэҥник тарҕаммыт. Ону тэҥэ, риновирус, парагрипп, саҥа коронавируснай инфекция ордук элбэх диэн суруйаллар.

Ыарыыны хаптатар инниттэн сэтинньи 5-10 күннэригэр Дьокуускай куорат оскуолаларыгар тэйиччиттэн үөрэх биллэриллибитэ. Хааччахтааһыҥҥа эбии үөрэхтээһин тэрилтэлэрэ, сиэксийэлэр, куруһуоктар, култуурунай-маассабай тэрээһиннэр эмиэ киирсэллэр.