Ааспыт нэдиэлэҕэ түөкүттэр 19 мөл. солк. уорбуттар

Ааспыт нэдиэлэҕэ түөкүттэр угаайыларыгар киирэн биэрэн, Саха сирин 22 олохтооҕо эмсэҕэлээбит, уоруллубут суума 19 мөл. солк. тахсаҕа тэҥнэһэр диэн борокуратуура иһитиннэрэр.

Ол курдук, түөкүттэр угаайыларыгар 6 биэнсийэлээх, 2 үлэтэ суох киһи, 2 доруобуйа харыстабылын, устудьуон, урбаанньыт, харабыл, лабаратыарыйа сэбиэдиссийэ уо.д.а. киирэн биэрбиттэр.

Араас уорганнар, тэрилтэлэр, ол иһигэр полиция, ФСБ, социальнай көмүскэл, баан, Энергосбыт, Росфинмониторинг, Биэнсийэ пуондатын үлэһиттэрэбит диэн куоһурданан төлөпүөннээн, 9 киһиттэн 9,4 мөл.солк. сойботон ылбыттар.

Аны “инвестициялааһын”, “куйаар ситиминэн үлэ”, “аахсыйа атыыта” схемаларынан 10 киһини 7,7 мөл. солк. ыраахтан олорон халаабыттар.

Суотабай сибээс оператордара буолабыт диэн албыннаан, сорох дьон барыта 1,7 мөл. солк. харчыларын былдьаппыттар.

Болҕомтолоох буолуҥ, түөкүттэр угаайыларыгар киирэн биэримэҥ!