Ааспыт нэдиэлэҕэ түөкүттэр Саха сирин олохтоохторуттан 18,2 мөл. солк. уорбуттар

Ааспыт нэдиэлэҕэ түөкүттэр Саха сирин олохтоохторун албыннаан, барыта 18,2 мөл. солк. харчыны уорбуттар.

“Уһун илиилээхтэргэ” 8 биэнсийэлээх, 2 үлэтэ суох киһи, устудьуон, 2 урбаанньыт, суоппар, сапараапка оператора, тириэньэр киирэн биэрбиттэр.

Биир киһини “инвестиция” схематынан албыннаан букатын 7,3 мөл. солк. уорбуттар. Тустаах схеманан барыта түөрт киһи угаайыга киирэн, 11,7 мөл. солк. былдьаппыт. “РФ киин бааныттан”, “ФСБтан”, “ИДьМтэн”, “Судаарыстыбаннай өҥөттөн” төлөпүөннүүбүт диэн сымыйалаан 7 киһиттэн 3,3 мөл. солк. уорбуттар. Онтон аккауннарын алдьаттаран, өрөспүүбүлүкэ үс олохтооҕо 1,7 мөл. солк. сүтэрбит. Ону тэҥэ, суотабай сибээс сымыйа операторын төлөпүөннээһинигэр киирэн биэрэн, 1,4 мөл. солк. былдьаппыттар.

Түөкүттэр олоҕу кытта тэҥҥэ хаамсаллар. Дьон саамай кыһалҕалаах, кэбирэх сирин билэн онон киирэн, оннооҕор үлэтэ суох киһини хабалаҕа киллэрэллэр. Сэрэхтээх буолуҥ.