Ааспыт сууккаҕа 15 ойуур баһаара умуруорулунна

Саха сиригэр ааспыт сууккаҕа 40 тыһ. гектартан улахан иэннээх 15 ойуур баһаара умуруорулунна диэн брифиҥҥэ Экология, айылҕаны туһаныы уонна ойуур хаһаайыстыбатын миниистирин солбуйааччы Андрей Коноплев иһитиннэрдэ.  

Бу Алдан, Дьааҥы, Кэбээйи, Ленскэй, Мииринэй, Ньурба, Өлүөхүмэ, Сунтаар уонна Томпо оройуоннарыгар баар уоттар туоратылыннылар.

Ол эрээри 12 га иэннээх икки саҥа ойуур баһаара күөдьүйбүтэ булулунна. Суукка саҕаланыытыгар 124 ойуур баһаара Абый, Алдан, Амма, Үөһээ Бүлүү, Дьааҥы, Бүлүү, Горнай, Эдьигээн, Кэбээйи, Ленскэй, Мииринэй, Нерюнгри, Ньурба, Өлүөхүмэ, Сунтаар, Усуйаана оройуоннарыгар умайа тураллар.

“Хас да оройуоҥҥа сөҥүү түстэ эрээри, дуона суох. Ол да буоллар бөлөхтөрү сыымайдааһыҥҥа, уот кытыытыгар тиийиигэ, минбалаһалары оҥорорго кыах биэрэр. Сүрүн сорук – ардах умулларбыт баһаара хаттаан күөдьүйбэтин тутуу уонна бохсуу буолар”, — диэтэ Коноплев.

Алдаҥҥа, Бүлүүгэ, Горнайга 4 баһаар бохсулунна, диэн иһитиннэрэр СӨ Ил Дарханын уонна Бырабыыталыстыбатын пресс-сулууспата.