Ааспыт сууккаҕа 20 ойуур баһаарын умуруордулар

Ааспыт сууккаҕа Саха сиригэр 14 тыһыынча гаа иэннээх сиргэ 20 ойуур баһаарын умуруордулар. Бу туһунан Экология, айылҕаны туһаныы уонна ойуур хаһаайыстыбатын миниистирин солбуйааччы Андрей Коноплев иһитиннэрдэ.

Баһаардары Алдан, Булуҥ, Эдьигээн, Кэбээйи, Мэҥэ Хаҥалас, Мииринэй, Нам, Нерюнгри, Томпо, Уус Маайа улуустарыгар умуруорбуттар.

Ону тэҥэ, салгынтан уонна куйаартан кэтээн көрүү түмүгэр, эбии 17 ойуур баһаара саҥа  булулунна: Абый, Үөһээ Халыма, Мэҥэ Хаҥалас, Муома, Нерюнгри, Орто Халыма, Кэбээйи, Уус Маайа, Усуйаана, Эбээн-Бытантай улуустарыгар. Бүгүҥҥү күҥҥэ 158,6 тыһыынча гаа иэннээх сиргэ 90 ойуур баһаара баара биллэр: Нерюнгригэ — 11, Үөһээ Халымаҕа, Өлүөхүмэҕэ, Орто Халымаҕа — 10-нуу, Алдаҥҥа — 9, Томпоҕо  — 8, Уус Маайаҕа — 6, Усуйаанаҕа — 5, Абыйга — 4, Дьааҥыга, Кэбээйигэ — 3,-түү, муомаҕа, Эбээн-Бытантайга — 2-лии, Аммаҕа, Горнайга, Мэҥэ Хаҥласка, Намҥа, Аллараа Халымаҕа, Өймөкөөҥҥө, Тааттаҕа — 1-дии.

Бу баһаардартан Амма, Дьааҥы, Өлүөхүмэ улуустарыгар баар 5 баһаар төгүрүтүлүннэ.

— Ойуур баһаардарыттан нэһилиэнньэлээх пууннарга уонна экэниэмикэ эбийиэктэригэр куттал суох, — диэн Андрей Коноплев иһитиннэрдэ.

Билигин баһаардары умуруорууга 724 киһи, 37 тиэхиньикэ уонна авиация үлэлиир.

Ил Дархан, бырабыыталыстыба пресс-сулууспата.