Ааспыт сууккаҕа 7 ойуур баһаарын умуруордулар

Ааспыт сууккаҕа баһаарынайдар  400,2 гаа иэннээх сиргэ 7 ойуур баһаарын умуруордулар. Бу туһунан өрөспүүбүлүкэ Экологияҕа, айылҕаны туһаныыга уонна ойуур хаһаайыстыбатыгар миниистирин солбуйааччы Андрей Коноплёв брифинг кэмигэр эттэ.

Ол курдук, Дьааҥы, Кэбээйи, Сунтаар уонна Уус-Маайа улуустарыгар баһаардары умуруордулар.

От ыйын 28 күнүнээҕи туругунан, өрөспүүбүлүкэҕэ 16 559 гаа иэннээх сиргэ 23 ойуур баһаара уонна 12 644 гаа иэннээх 3 хонуу баһаара баар. Кинилэри умуруорууга 324 киһи үлэлии сылдьар.

Тэҥнээн көрөр буоллахха, былырыын баччаларга 1 мөл. гаа иэннээх сиргэ 131 ойуур баһаара умайара.

Уопсайа сайын саҕаланыаҕыттан 65 346,3 гаа иэннээх сиргэ 406 ойуур баһаарын умуруордулар, ол иһигэр  57 782,26 гаа иэннээх ойуур пуондатын сирдэригэр 213 ойуур баһаара турбут.

Сезон саҕаланыаҕыттан 65 буруйдаах быһаарылынна, ойуурга баһаарыттан куттал суох буолуутун быраабылаларын кэһии иһин 145 боротокуол оҥоһулунна.

Ойуур баһаарын биллэххинэ, тута 7 (4112) 44-74-76 нүөмэргэ Эрэгийиэннээҕи ойуур хаһаайыстыбатын диспетчерскэй сулууспатыгар эрийиҥ. Өссө биир нүөмэр: 8-800-100-94-00.

Сиһилии: https://www.sakha.gov.ru/news/8940