Ааспыт сууккаҕа биир даҕаны саҥа ойуур баһаара бэлиэтэммэтэ

Ойуур баһаарын бохсууга үлэлэһэр өрөспүүбүлүкэтээҕи суһал ыстаап иһитиннэриитинэн, 13:00 чаастааҕы туругунан, Абый, Үөһээ Бүлүү, Дьааҥы, Бүлүү, Горнай, Кэбээйи, Ленскэй, Ньурба, Өлүөхүмэ, Орто Халыма, Сунтаар, Усуйаана, Эбээн Бытантай улуустарын сиригэр-уотугар 15 килэмиэтирдээх зонаҕа 24 ойуур баһаара хонтуруолга турар.

Биир да нэһилиэнньэлээх пууҥҥа куттал суоһаабат. Бүгүҥҥү күннээҕи чахчынан, ойуур баһаарын умуруорууга 1569 киһи уонна 155 тиэхиньикэ үлэлиир. 6 сөмөлүөт авиапатрулированиеҕа, оттон 7 баһаарынай үлэҕэ кыттар.

Бу туһунан бүгүн, атырдьах ыйын 17 күнүгэр, СӨ ыксаллаах быһыыны-майгыны сэрэтэр, суох оҥорор уонна баһаар куттала суох буолуутун хааччыйар хамыыһыйатын мунньаҕар СӨ Бырабыыталыстыбатын Бэрэссэдээтэлин Бастакы солбуйааччы Дмитрий Садовников кыттыылаах мунньахха Саха  сиригэр  Арассыыйа  Ыксаллаах быһыы-майгы министиэристибэтин Кылаабынай управлениетын салайааччытын бастакы солбуйааччы Виталий Немцов иһитиннэрдэ.