Ааспыт сууккаҕа буруйу оҥоруу түөрт түбэлтэтэ бэлиэтэннэ

Ааспыт сууккаҕа өрөспүүбүлүкэ сиригэр-уотугар буруйу оҥоруу түөрт түбэлтэтэ бэлиэтэннэ. Бу туһунан СӨ Борокуратууратын пресс-сулууспата иһитиннэрэр.

Нерюнгри куоракка эт-хаан эчэйиилээх, 1986 с.т. дьахтар өлүгэ итиэннэ 1988 с.т. киһи улаханнык кырбанан сытара булулунна. Буруйу оҥорууга уорбаланааччы быһаарыллыбыт.

Дьокуускайга түөкүннээһин чахчытынан холуобунай дьыала тэрилиннэ, хоромньу суумата 105 тыһ. солк. (биллэрин курдук, «баан үлэһитэ» төлөпүөннээбит ).

Суукка иһигэр түөрт техногеннай баһаар умуруоруллубут, өлбүт уонна эчэйбит киһи суох.

Киһи өлүүлээх суол-иис-тырааныспар быһылаана тахсыбыта бэлиэтэммэтэ. Дьааҥы улууһун сиригэр-уотугар «Яна» айан суолун 753 км итирик туруктаах «УАЗ» массыына суоппара утары иһэр эмиэ «УАЗ» массыынаны кытары харсыста. Быһылаан түмүгэр, суоппардар иккиэн, ону кытары олорсон испит икки эт-хаан араас эчэйиитин ыланнар балыыһаҕа киирдилэр.