Ааспыт сууккаҕа Дьокуускай куоракка суол-тырааныспар 10 быһылаана таҕыста

Олунньу 10 күнүгэр 13 чаас саҕана суолу туораан иһэр 4 киһини массыына түҥнэри көттө диэн  Госавтоиниспиэксийэ иһитиннэрэр.  Суол саахалыгар эт-хаан араас эчэйиитин ылбыт дьоҥҥо тастан сылдьан эмтэнии ананна.

Суолу кэтээн көрөр судаарыстыбаннай иниспиэксийэ суоппардарга массыынаны ыытар кэмҥэ суол туругун, массыына икки ардын учуоттуургутун, кутталлаах албастары оҥорбоккутугар сүбэлиир. Ордук сатыы дьон туоруур сирдэригэр, уопсастыбаннай тырааныспар тохтобулларыгар уонна суол быһа охсуһуутугар сэрэхтээх буоларга ыҥырар.

Оттон сатыы дьон тротуарынан эрэ хаамалларыгар уонна бастаан куттал суоһаабатын бэрэбиэркэлээн баран, сатыы дьон туоруур сирдэринэн туоруурга сүбэлииллэр. Ону таһынан, тас таҥаска сырдыгы тэйитэр араас элэмиэннэри, анал бэлиэлэри сыһыаран, тигэн биэрэргит ордук диэн сүбэлииллэр.