Ааспыт сууккаҕа суол саахалыгар биэс киһи эчэйиини ылбыт

Дьокуускай куоракка бэс ыйын 16 күнүгэр  6 суол быһылаана таҕыста. Биэс киһи эчэйиини ылбытын туһунан Госавтоинспекция  иһитиннэрдэ.

Ол курдук  14 чаас саҕана Хабаров уул. 27/2 дьиэтин  таһыгар сатыы дьон туоруур сиригэр, «Toyota Pixis Epoch» массыына  68 саастаах суоппара 8 саастаах оҕону түҥнэри көппүт.  Ол түмүгэр оҕо эчэйиини ылбыт.

Аны киэһэ дьуһуурунай бөлөххө  Петровскай уул. 23 дьиэтин таһыгар икки массыына харсыспытын туһунан иһитиннэрии киирбит. 48 саастаах  «Toyota Ipsum» суоппара иннигэр айаннаан иһэр  «Toyota Allion» массыынаҕа  аһара чугаһаан, суол быһылаана тахсарыгар төрүөт буолбут.  Ол түмүгэр «Toyota Ipsum» икки пассажира эчэйбит.