Ааспыт сууккаҕа үс ойуур баһаарын умуруордулар

Саха сиригэр ойуур баһаардарын умуруорууга 298 киһи тардылынна. Ааспыт суукка устата уот бохсооччулар Бүлүү уонна Ленскэй оройуоннар сирдэригэр-уоттарыгар үс баһаары умуруордулар. Бу туһунан от ыйын 7 күнүгэр, чэппиэргэ, СӨ Экологияҕа, айылҕаны туһаныыга уонна ойуур хаһаайыстыбатыгар миниистирин солбуйааччыта Андрей Коноплев иһитиннэрдэ.

Сарсыардааҥы туругунан, 19 ойуур баһаара умайар. Олортон 11 ойуур баһаара ыраах, уустук суоллаах сирдэринэн баар. Баһаар уопсай иэнэ 77 тыһыынча гектартан тахса. Дьааҥы, Өлүөхүмэ, Чурапчы уонна Эбээн-Бытантай оройуоннарыгар, ону таһынан Жатай бөһүөлэгэр Баһаартан сэрэхтээх буолуу ураты эрэсиимнэрэ биллэриллибиттэрэ. Дьааҥы улууһун сиригэр-уотугар тыаҕа ЫБМ эрэсиимэ салҕанар.