Сыл бэлиэ түгэннэрин, үлэни-хамнаһы көрдөрөр быыстапканы кэрэхсээтилэр

Уус Алдан улууһун киинигэр Бороҕоҥҥо ааспыт сыл түмүктэрин таһаарар улахан тэрээһиннэр ыытылыннар.

Бу күн улуус нэһилиэктэрэ Н.Н. Тарскай аатынан успуорт уораҕайыгар муһуннулар. РФ Дьиэ кэргэн, СӨ Оҕо саас, улууспутугар Аҕа сылларын түмүктүү ааспыт сыл бэлиэ түгэннэрин, ыытыллыбыт үлэлэри, ытык дьону, бастыҥ үлэһиттэри сырдатар быыстапкалары дьоҥҥо-сэргэҕэ көрдөрдүлэр.

Быыстапкалары нэһилиэктэр бибилэтиэкэлэрэ бары кэриэтэ олус интэриэһинэйдик толкуйдаан, оҥорон, хаартыскаларынан киэргэтэн, ситэрэн-хоторон аҕалбыттар. Манна улууспут нэһилиэктэригэр ааспыт 2024 сыл устатыгар туох үлэ-хамнас, тэрээһин, күрэхтэһии ыытыллыбытын көрдөрөр быыстапкалар элбэҕи кэпсииллэр, болҕомтону тардаллар.

Дьон-сэргэ манна сылдьан улаханнык сэргэхсийдилэр, быыстапканы сэргээн-сэҥээрэн көрдүлэр, биһирээтилэр, тэрийээччилэргэ махтаннылар, санааларын үллэһиннилэр.

Раиса Черкашина

Хаартыскалар ааптар тиксэриилэрэ